Texniki baxış mərkəzləri üçün yeni qaydalar qüvvəyə mindi – hansı dəyişikliklər nəzərdə tutulur

Gürcüstan hökuməti texniki baxış mərkəzləri üçün yeni qaydaları təsdiqləyib.

Qərar periodik texniki baxış mərkəzlərinin binalarına, avadanlıqlarına və personalın texniki ixtisasına dair tələbləri müəyyən edir.

Sənədə əsasən, bütün texniki baxış mərkəzləri Yerüstü Nəqliyyat Agentliyi tərəfindən tələb olunan formada vahid elektron bazaya qoşulmalı və müvafiq məlumatları elektron qaydada təqdim etməlidirlər.

Yeni tələblərə əsasən mərkəzlər:

• fasiləsiz telefon və internet bağlantısı ilə təmin olunmalıdır;

• yoxlamaların dəqiqliyini və etibarlılığını təmin edən müasir kompüter və elektron texnika ilə təchiz edilməlidir;

• texniki baxış nəticələrini öz elektron bazasında müvafiq dövr ərzində saxlamalıdır;

• avtomobillərin texniki baxış menecmenti üzrə informasiya sisteminə qoşulmalıdır.

İnformasiya sistemi imkan verməlidir:

• vətəndaşların texniki baxış üçün onlayn qeydiyyatdan keçməsinə;

• yoxlamaların nəticələrinin avtomatik və etibarlı şəkildə mərkəzi serverə ötürülməsinə (çəkidən, əyləc testindən, qaz analizatorundan və tüstü ölçən avadanlıqdan gələn məlumatlar daxil olmaqla);

• avtomobilin dövlət nömrə nişanı ilə texniki baxış statusunun yoxlanmasına;

• texniki baxışdan keçmiş avtomobillərlə bağlı statistik məlumatların toplanmasına;

• Xidmət Agentliyindən avtomobilin qeydiyyat məlumatlarının əldə edilməsinə.

Məlumat bazasına, vətəndaşların şəxsi məlumatları istisna olmaqla, Daxili İşlər Nazirliyinin Patrul Polis Departamenti, Xidmət Agentliyi, Akkreditasiya Mərkəzi və Yerüstü Nəqliyyat Agentliyi öz səlahiyyətləri çərçivəsində çıxış əldə edə biləcəklər.

Videomüşahidə sistemi də məcburi olur:

• hər bir avtomobilin ön və arxa dövlət nömrə nişanı aydın görünməlidir;

• video kadrda avtomobilin tam texniki baxış prosesi əks olunmalıdır;

• kameraların sayı və baxış bucağı hər avtomobilin və onun ətrafındakı ərazinin dörd tərəfdən müşahidəsini təmin etməlidir;

• çəkiliş fasiləsiz, sutka ərzində aparılmalı və görüntülər ən azı 14 ay saxlanılmalıdır.

Qərara görə, videomüşahidə sisteminə Daxili İşlər Nazirliyinin səlahiyyətli əməkdaşları da çıxış əldə edə biləcəklər.

Sənədə əsasən, Yerüstü Nəqliyyat Agentliyi 2026-cı il dekabrın 31-dək yeni vahid elektron bazanı tam şəkildə yaratmalı və idarəetməsini təmin etməlidir.

mənbə: interpress