Tbilisidə tikintidə çalışan fəhlə iş yoldaşını bıçaqlayaraq öldürdü

Gürcüstanın paytaxtı Tbilisidə tikinti meydançasında çalışan fəhlələr arasında baş vermiş mübahisə qətllə nəticələnib.

 Xeber.ge "Tv Pirveli" telekanalına istinadən verdiyi məlumata görə, insident zamanı bir nəfər aldığı ağır xəsarətlərdən dünyasını dəyişib.

İstintaq materiallarına görə, hadisə dünən Tbilisinin Tsereteli prospektində, "İksori" (Ixori) şirkətinin inşaat aparılan ərazisinin yaxınlığında qeydə alınıb.

Tikintidə çalışan fəhlələrdən biri digərinə soyuq silahla döş qəfəsi (ürək) nahiyəsindən ağır xəsarətlər yetirib.

Zərərçəkmiş şəxs hadisə yerindəcə həddindən artıq qanitirmədən vəfat edib.

Jurnalistlərin əldə etdiyi ilkin məlumatlara görə, tərəflər arasında yaranmış qanlı münaqişəyə əməkhaqqı və ya tərəflər arasındakı pul borcu ilə bağlı yaranan maliyyə davası səbəb olub.

Hadisədən dərhal sonra Gürcüstan Daxili İşlər Nazirliyinin Tbilisi Polis Departamentinin əməkdaşları tərəfindən həyata keçirilən operativ tədbirlər nəticəsində qəsdən adam öldürməkdə şübhəli bilinən bir nəfər fəhlə saxlanılaraq istintaqa cəlb edilib.

  Faktla bağlı Gürcüstan Cinayət Məcəlləsinin 108-ci maddəsi (qəsdən adam öldürmə) ilə cinayət işi başlanılıb. Bu maddənin sanksiyasına əsasən, cinayəti törətmiş şəxsi 15 ilədək müddətə azadlıqdan məhrumetmə cəzası gözləyir. Hazırda hüquq-mühafizə orqanları tərəfindən hadisə şahidlərinin dindirilməsi və digər zəruri istintaq hərəkətləri davam etdirilir.