Hicablı müsəlman alim Rəna Dəcani

İordaniyalı müsəlman hicablı xanım – molekulyar bioloq Rəna Dəcani elmi fəaliyyəti, genetika sahəsində araşdırmaları və uşaqlar arasında mütaliə mədəniyyətinin inkişafına yönəlmiş təşəbbüsü ilə tanınan müsəlman qadın alimlərdəndir.

XEBER.GE xeber  verir ki, Professor Rəna xanım Dəcani epigenetika, genetika və qaçqınların yaşadığı travmaların bioloji təsirləri üzrə araşdırmalar aparır. Onun elmi maraqları ətraf mühitin və çətin həyat şəraitinin insan biologiyasına təsirini öyrənməyi də əhatə edir.

Dəcani ali təhsilini İordaniyada alıb, daha sonra ABŞ-nin Ayova Universitetində molekulyar biologiya üzrə doktorluq dərəcəsi qazanıb. O, karyerası ərzində Yel, Harvard, Massaçusets Texnologiya İnstitutu və Kembric kimi nüfuzlu ali təhsil və tədqiqat müəssisələri ilə əməkdaşlıq edib.

Alimin fəaliyyəti yalnız laboratoriya tədqiqatları ilə məhdudlaşmır. O, elmdə qadınların iştirakının artırılmasını, gənc tədqiqatçıların dəstəklənməsini və elmi imkanların daha geniş kütlələr üçün əlçatan olmasını müdafiə edir.

Uşaqlara kitab sevgisi aşılayan təşəbbüs

Rəna Dəcaninin ən mühüm sosial təşəbbüslərindən biri 2010-cu ildə yaratdığı “We Love Reading” (“Oxumağı sevirik”) proqramıdır. Layihənin əsas məqsədi uşaqlarda erkən yaşlardan mütaliəyə maraq yaratmaq və kitab oxumağı yalnız dərslə bağlı fəaliyyət deyil, həm də zövq verən vərdişə çevirməkdir.

İordaniyada başlayan təşəbbüs sonradan beynəlxalq miqyasda yayılıb. Layihə çərçivəsində könüllülər uşaqlara ucadan kitab oxuyur, yerli icmalarda mütaliə mühitinin formalaşmasına kömək edirlər. Beynəlxalq Elm Şurasının məlumatına əsasən, proqram 60-dan çox ölkədə fəaliyyət göstərib.

Bu təşəbbüsə görə Dəcani və onun yaratdığı proqram bir sıra beynəlxalq mükafatlara layiq görülüb. Onların arasında 2017-ci ildə UNESCO-nun Kral Sejonq adına Beynəlxalq Savadlılıq Mükafatı da var. Alim 2020-ci ildə BMT-nin Qaçqınlar üzrə Ali Komissarlığının Nansen mükafatını alanlar sırasında da yer alıb.

Elm, təhsil və ictimai fəaliyyətin vəhdəti

Rəna Dəcani elmi biliklərin cəmiyyətin problemlərinin həllinə yönəldilməsinin vacibliyini vurğulayan alimlərdəndir. Onun fəaliyyəti genetika və epigenetika sahəsində araşdırmaları, qadın alimlərə dəstək təşəbbüsləri və uşaqlar arasında mütaliənin təşviqi kimi müxtəlif istiqamətləri birləşdirir.

Dəcani həmçinin müsəlman qadınların elm və akademik fəaliyyət sahəsində uğur qazana biləcəyini göstərən nümunələrdən biri kimi diqqət çəkir. Onun həyatı elmi karyera, ictimai məsuliyyət və təhsilə töhfənin bir araya gələ biləcəyini nümayiş etdirir.

mənbə: az.shafaqna.com