Hökumət əcnəbilərə yaşayış icazələrinin verilməsi ilə bağlı qanuna dəyişiklik etdi

Gürcüstan hökuməti əcnəbilərə yaşayış icazəsinin verilməsi ilə bağlı qanuna dəyişiklik edib.

Yeni qaydalar xüsusilə informasiya texnologiyaları (IT) sahəsində çalışan xarici mütəxəssislərə aiddir.

Dəyişikliyə əsasən, IT sahəsində çalışan əcnəbilər müvəqqəti yaşayış icazəsi ala biləcəklər, əgər onların illik gəliri 25 min ABŞ dollarından (ekvivalent olaraq laridə) az olmazsa. Bunun üçün onlar gəlirləri barədə rəsmi arayış təqdim etməlidirlər.

Əvvəllər qanunda bu cür şərt mövcud deyildi.

Yeni qərara görə, müvəqqəti yaşayış icazəsi almaq istəyən IT mütəxəssisləri aşağıdakı sənədləri təqdim etməlidirlər:

müəyyən olunmuş formada ərizə və unikal qeydiyyat kodu;

pasportun surəti;

Gürcüstanda qanuni qalmanı təsdiq edən sənəd;

IT sahəsində ən azı 2 illik təcrübəni təsdiqləyən sənəd;

son bir ildə IT fəaliyyətindən əldə olunmuş və azı iki dəfə ödənilmiş 25 min ABŞ dollarından az olmayan gəlir barədə arayış;

3x4 ölçüdə rəngli foto (elektron formada);

xidmət haqqının ödənilməsini təsdiqləyən qəbz və digər sənədlər.

Qərara əsasən, IT mütəxəssisləri üçün müvəqqəti yaşayış icazəsi 6 aydan 3 ilə qədər müddətə veriləcək. İcazənin müddəti hər dəfə 3 il olmaqla uzadıla bilər, lakin ümumilikdə 12 ildən çox olmayacaq.

Həmçinin, sənəddə qeyd olunur ki, müvəqqəti yaşayış icazəsi ləğv ediləcək, əgər şəxs Gürcüstan ərazisində ardıcıl 12 ay ərzində 183 gün və ya daha çox faktiki olaraq ölkədə qalmasa.

Yeni qaydalara görə, IT mütəxəssisi hesab ediləcək şəxslər Beynəlxalq Əmək Təşkilatının ISCO-08 təsnifatında 25-ci kodla nəzərdə tutulan sahələrdə çalışanlar və ya Gürcüstanda qeydiyyatdan keçmiş, milli təsnifata uyğun IT fəaliyyəti ilə məşğul olan kiçik sahibkarlar olacaq.

mənbə: interpress