Gürcüstanda kater və yaxtalar qeydiyyata alınacaq

 İyulun 1-dən mühərrikli qayıqlar və katerlər üçün qeydiyyat və sürücülük sertifikatı məcburi olur

Gürcüstan Dəniz Nəqliyyatı Agentliyinin yaydığı məlumata görə, ölkədə naviqasiya və sərnişin təhlükəsizliyini təmin etmək məqsədilə daxili su hövzələrində (göllər, çaylar və su anbarları) üzən mühərrikli vasitələrin qeydiyyatı və xüsusi sürücülük sertifikatının alınması icbari xarakter daşıyacaq.

XEBER.GE xəbər verir ki, könüllü qeydiyyat dövrü başa çatdıqdan sonra, 2026-cı il iyulun 1-dən etibarən qanunun tələblərini pozan şəxslər inzibati məsuliyyətə cəlb olunacaq və cərimələnəcəklər.

Qayda daxili su hövzələrində hərəkət edən və ya sərnişin daşıyan bütün fiziki və hüquqi şəxslərə şamil edilir. Qeydiyyata alınmalı olan vasitələr:

Katerlər, yaxtalar və motorlu qayıqlar;

Hidrosikllər (skuterlər);

Katamaranlar və sərnişin platformaları.

Qeydiyyatdan əvvəl hər bir su nəqliyyatı vasitəsi agentlik tərəfindən tanınmış müfəttişlik qurumunda texniki baxışdan keçməlidir.

Sürücülük sertifikatı necə alınacaq?

Mühərrikli su nəqliyyatı vasitələrini idarə etmək üçün sürücülük sertifikatı mütləq olacaq:

Sertifikat 5 il müddətinə verilir;

Sənədi almaq üçün şəxsin minimum 18 yaşı olmalıdır;

Namizədlər agentlik tərəfindən akkreditasiya olunmuş dəniz təlim müəssisəsində xüsusi hazırlıq proqramını uğurla başa vurmalıdırlar.

Hazırda bu təlim proqramını keçirmək hüququ yalnız Batumi Dövlət Dəniz Akademiyasının Dəniz Təlim Mərkəzinə məxsusdur.

Yeni qaydalar bəzi su vasitələrinə şamil edilməyəcək:

Kayaklar (kanoe);

Şəxsi məqsədlər üçün istifadə olunan qeyri-kommersiya təyinatlı bəzi vasitələr;

Uzunluğu 3 metrdən az olan və mühərriki (motoru) olmayan qayıqlar.

Agentliyin statistika məlumatlarına görə, bu islahatın keçirilməsi zərurətdən doğub. Belə ki, 2020-2026-cı illər ərzində Gürcüstanın çay, göl və su anbarlarında müxtəlif su nəqliyyat vasitələrinin iştirakı ilə 80 bədbəxt hadisə (insident) qeydə alınıb. Yeni tənzimləmələr daxili sularda hərəkəti təhlükəsiz etməyi və bu növ qəzaların qarşısını almağı hədəfləyir.