Gürcüstanda dövlət torpaqlarını dələduzluqla ələ keçirməkdə ittiham olunan 13 nəfər var

Gürcüstan Maliyyə Nazirliyinin İstintaq Xidməti dövlətə məxsus torpaq sahələrini dələduzluq yolu ilə ələ keçirmə ilə bağlı dörd ayrı cinayət işi üzrə 13 nəfərə ittiham irəli sürüb.

XEBER.GE xeber  verir ki, qurumun məlumatına görə, təqsirləndirilən şəxslərin qanunsuz yollarla ələ keçirdikləri torpaq sahələrinin ümumi sahəsi 11 929 kvadratmetr, ümumi dəyəri isə 1 025 719 laridən çoxdur.

Təqsirləndirilən şəxsləri 6 ildən 9 ilədək həbs cəzası gözləyir.

İstintaq Xidmətinin məlumatına əsasən, birinci cinayət işi üzrə təqsirləndirilən şəxslərdən biri saxta təhvil-təslim aktları hazırlayıb istifadə etməklə Tbilisinin Qldani kəndində yerləşən, dövlətə məxsus ümumi sahəsi 1 000 kvadratmetr olan iki torpaq sahəsini qanunsuz olaraq ələ keçirib. Həmin torpaq sahələrinin bazar dəyəri 116 000 laridən çoxdur.

İstintaq, o cümlədən gizli istintaq tədbirləri nəticəsində saxta rəsmi sənədlərin hazırlanması və istifadəsi yolu ilə qabaqcadan əlbir olan bir qrup tərəfindən dövlət torpaqlarının dələduzluq yolu ilə ələ keçirilməsi və bu cinayətə kömək edilməsi faktları da aşkarlanıb.

İkinci cinayət işi üzrə müəyyən edilib ki, səkkiz təqsirləndirilən şəxs saxta mülkiyyət hüququnu təsdiq edən sənədləri Gürcüstanın İctimai Reyestr Milli Agentliyinə təqdim etməklə Tbilisinin Qldani kəndində yerləşən dövlətə məxsus torpaq sahələrini qrup halında dələduzluq yolu ilə öz adlarına rəsmiləşdiriblər. Ümumi sahəsi 2 000 kvadratmetr olan bu torpaqların dəyəri 733 760 lari təşkil edir. Həmin torpaq sahələri artıq tamamilə özgəninkiləşdirilib.

Üçüncü cinayət işi üzrə iki nəfər torpaq sahələrini qeydiyyata almaq məqsədilə İctimai Reyestr Milli Agentliyinə bilərəkdən yanlış məlumat verib, qeydiyyat orqanını aldadaraq Aspinca bələdiyyəsinin Nicqori kəndində yerləşən, dövlətə məxsus ümumi sahəsi 1 840 kvadratmetr olan iki torpaq sahəsini qanunsuz olaraq ələ keçirib. Həmin torpaqların ümumi dəyəri 12 912 laridir.

Dördüncü cinayət işi üzrə isə müəyyən edilib ki, təqsirləndirilən şəxslər qeydiyyat orqanına bilərəkdən saxta məlumatlar təqdim etməklə Mtsxeta-Mtianeti bölgəsinin bələdiyyələrindən birində yerləşən, dövlətə məxsus ümumi sahəsi 7 089 kvadratmetr olan torpaq sahələrini dələduzluq yolu ilə ələ keçiriblər. Bu torpaqların bazar dəyəri 163 047 laridir.

Bununla yanaşı, istintaq və prosessual tədbirlər nəticəsində həmin şəxslərin eyni bölgədə yerləşən, dövlətə məxsus ümumi sahəsi 10 321 kvadratmetr olan torpaq sahələrini də dələduzluq yolu ilə ələ keçirmək cəhdlərinin qarşısı alınıb. Bu torpaqların bazar dəyəri 150 660 laridir.

İstintaq Xidməti digər torpaq sahələrinin qeydiyyatının qanuniliyini yoxlamaq və cinayətdə iştirak etmiş ola biləcək başqa şəxsləri müəyyənləşdirmək üçün tədbirləri davam etdirir.

Faktlarla bağlı Gürcüstan Cinayət Məcəlləsinin 180-ci maddəsinin ikinci və üçüncü hissələri, eləcə də 362-ci maddəsi ilə istintaq aparılır. Göstərilən maddələr 6 ildən 9 ilədək azadlıqdan məhrumetmə cəzasını nəzərdə tutur.