Ölkədə qalmaq üçün saxta nikah bağlayan əcnəbilər həbs ediləcək

Gürcüstanın Cinayət Məcəlləsinə ölkədə qanuni yaşayış hüququ əldə etmək məqsədilə saxta nikah bağlamağa görə cəzanı nəzərdə tutan yeni maddə əlavə edilib.

XEBER.GE xəbər verir ki, bu barədə Gürcüstan Daxili İşlər nazirinin müavini Aleksandre Daraxvelidze bəyanat verib.

  Parlamentə təqdim olunan yeni qanunvericilik paketi qanunsuz miqrasiyaya qarşı mübarizənin ikinci mərhələsidir və ölkədə qalma mexanizmlərinə ciddi nəzarət məqsədi daşıyır.

Nazir müavininin sözlərinə görə, mövcud qanunvericiliyə əsasən, Gürcüstan vətəndaşı ilə nikah bağlamaq əcnəbinin ölkədə müddətsiz yaşayış icazəsi alması üçün kifayət edirdi. Hazırda ölkədə 30 minə yaxın əcnəbinin bu yolla daimi yaşayış icazəsi aldığını bildirən Daraxvelidze, indiyə qədər bu istiqamətdə nəzarət mexanizmlərinin olduqca zəif olduğunu vurğulayıb.

Yeni qaydalara əsasən, fırıldaqçı sxemlərin qarşısını almaq üçün xüsusi yoxlama sistemi tətbiq olunacaq:

• Gürcüstan vətəndaşı ilə evlənib yaşayış icazəsi tələb edən əcnəbi xüsusi komissiya tərəfindən müsahibəyə cəlb olunacaq.
• Əgər komissiya nikahın real olmadığına və saxta xarakter daşıdığına dair şübhələr aşkar edərsə, müvafiq sənədlər dərhal istintaq orqanlarına göndəriləcək.
• Cinayət Məcəlləsinə qəbul edilən yeni maddəyə əsasən, leqal yaşayış hüququ qazanmaq məqsədilə qurulan saxta nikahlar cinayət məsuliyyəti yaradacaq.

Nazir müavini onu da qeyd edib ki, qanun layihəsində təhsil vizaları ilə bağlı məsələlərə də yenidən baxılıb. Hazırda əcnəbilərə 35 minə yaxın təhsil vizası verilib.

Lakin təcrübədə bəzi şəxslərin bu icazədən oxumaq üçün deyil, sadəcə ölkədə uzunmüddətli qalmaq üçün istifadə etdiyi müəyyən olunub.

Yeni requlyasiyalar həqiqətən təhsil alan tələbələrə heç bir maneə yaratmayacaq, lakin bu statusdan sui-istifadə edərək qanunsuz qalanlara qarşı sərt tədbirlər görüləcək.

"Ötən il tətbiq edilən dəyişikliklər artıq öz bəhrəsini verir və ictimaiyyət hər gün qanunsuz yollarla ölkədə qalan əcnəbilərin Gürcüstandan qovulmasının şahidi olur. Bu ikinci paket isə qanunvericilikdəki boşluqları tamamilə qapadacaq. Yaşayış icazəsini yalnız buna həqiqətən ehtiyacı və hüququ olan şəxslər ala biləcəklər".