Luvrda soyğun törədən şəxs sosial media fenomeni imiş

Oktyabrın 19-da Fransanın paytaxtı Parisdəki Luvr Muzeyində baş verən soyğunla bağlı yeni detallar üzə çıxıb.

Xeber.ge xeber  verir ki, hadisəni törətməkdə şübhəli bilinən şəxslərdən birinin sosial media fenomeni olduğu müəyyən edilib.

Məlumata görə, saxlanılan şəxs motosikletlərə və sosial media paylaşımlarına marağı ilə tanınan 39 yaşlı Abdoulaye N.-dir. O, soyğundan altı gün sonra evində tutulub. Abdoulaye “YouTube” və “TikTok” platformalarında “Doudou Cross Bitume” adı ilə videolar paylaşırmış.

Araşdırmalar göstərib ki, o, videolarında nümayiş etdirdiyi motosikletini Luvrdakı soyğun zamanı da istifadə edib. Qonşuları onu “yardımsevər və nəzakətli insan” kimi təsvir etsələr də, məlum olub ki, Abdoulaye daha əvvəl zərgərlik mağazasına edilən soyğunçuluqda iştirakına görə üç il həbs cəzası çəkib.

mənbə: publika.az