Gürcüstandan 22 xarici ölkə vətəndaşı deportasiya olunub

Son günlərdə keçirilmiş kompleks tədbirlər nəticəsində ölkədən 22 nəfər xarici ölkə vətəndaşı çıxarılıb.

Bu barədə Gürcüstan Daxili İşlər Nazirliyi (DİN) məlumat yayıb.

Nazirliyin açıqlamasına görə, deportasiya olunan şəxslər Misir, Türkiyə, Türkmənistan, Hindistan, İordaniya, İran, Suriya, Pakistan, Rusiya və Keniya vətəndaşlarıdır. Onlara ölkəyə daxilolma qadağası qoyulub.

DİN-in Miqrasiya Departamenti və nazirliyin digər müvafiq strukturlarının koordinasiyası ilə həyata keçirilmiş tədbirlər nəticəsində bu şəxslərin ölkədən çıxarılması təmin olunub.

Nazirliyin bəyanatında qeyd olunur ki, Miqrasiya Departamenti Gürcüstanda qanunsuz miqrasiya ilə mübarizəyə cavabdeh əsas qurumdur. Onun funksiyalarından biri də ölkədə hüquqi əsas olmadan yaşayan xarici vətəndaşların müəyyən olunması və deportasiya prosedurunun icrasıdır.

mənbə: interpress