Gürcüstan millisinə AvroBasketdə əldə etdiyi tarixi uğura görə mükafat veriləcək

Ölkənin basketbol üzrə milli komandasının AvroBasketdə əldə etdiyi tarixi uğura görə hökumət tərəfindən 3 milyon lari mükafat ayrılacaq.

Bu barədə baş nazir İrakli Kobaxidze Nazirlər Kabinetinin iclasında bildirib.

İrakli Kobaxidzenin sözlərinə görə, komandanın əldə etdiyi tarixi nəticə hökumət tərəfindən xüsusi olaraq qiymətləndiriləcək:

“Basketbol sahəsində tarixi nəticə əldə olunub. Bu nailiyyətin hökumət tərəfindən də müvafiq pul mükafatı ilə qeyd olunması vacibdir. Artıq əldə olunmuş uğura görə 3 milyon lari ayrılacaq.”

Baş nazir əlavə edib ki, milli komanda AvroBasketdə hər növbəti qələbə qazandıqca, onlar üçün əlavə 3 milyon lari mükafat təyin olunacaq:

“Avropa çempionatında hər növbəti qələbə üçün də biz 3 milyon lari mükafat verəcəyik.”

Qeyd edək ki, Gürcüstanın basketbol millisi dünən AvroBasket-in səkkizdəbir final mərhələsində Fransanı məğlub edib. Bu qələbə ilə Gürcüstan tarixində ilk dəfə Avropa çempionatının 1/4 final mərhələsinə yüksəlib.

mənbə: interpress