Gürcüstan Hökumət Administrasiyasında qiymət artımı ilə bağlı kritik toplantı

Gürcüstan Hökumət Administrasiyasında məhsul qiymətləri ilə bağlı distribütor şirkətlərin nümayəndələri ilə görüş keçirilib.

Xeber.ge xeber  verir ki, görüşdə Dövlət Təhlükəsizliyi Xidmətinin rəhbəri və maliyyə naziri iştirak ediblər. Qeyd edək ki, dünən həmin qurumların müstəntiqləri məhkəmə qərarı əsasında şirkətlərin baş ofislərinə daxil olaraq maliyyə sənədlərini və məlumat bazalarına çıxış icazəsini tələb ediblər.

Distribütor şirkətlərin nümayəndələri müstəntiqlərin ofislərdə görünməsinin onlar üçün gözlənilməz olduğunu bildiriblər. Şirkət rəsmilərinin sözlərinə görə, məhkəmə yolu ilə tələb olunan həmin sənədləri Rəqabət Agentliyi adi qaydada da əldə edə bilərdi.

Buna baxmayaraq, şirkətlər yaranmış problemlərin həlli və məsələlərin aydınlaşdırılması üçün bütün zəruri məlumatları təqdim etməyə hazır olduqlarını bəyan ediblər.