Tbilisidə parkda azyaşlıya qarşı əxlaqsızlıq edən şəxs tutuldu

  Tbilisidə azyaşlıya qarşı törədilən növbəti ağır cinayət faktı hüquq-mühafizə orqanları tərəfindən ifşa edilib.

Xeber.ge xəbər verir ki, Gürcüstan Daxili İşlər Nazirliyinin (DİN) əməkdaşları tərəfindən azyaşlıya qarşı əxlaqsız hərəkətlər törətməkdə ittiham olunan bir nəfər saxlanılıb.

Daxili İşlər Nazirliyinin yaydığı rəsmi məlumata görə, aparılan istintaq hərəkətləri nəticəsində müəyyən edilib ki, təqsirləndirilən şəxs Tbilisinin Diğomi massivi ərazisində yerləşən istirahət parklarından birində azyaşlı qıza qarşı əxlaqsız və cinsi xarakterli hərəkətlər  törədib.

Hadisə barədə məlumat daxil olan kimi polis qrupları tərəfindən təxirəsalınmaz operativ-axtarış və istintaq tədbirləri həyata keçirilib.

Görülən işlər nəticəsində cinayəti törətməkdə şübhəli bilinən şəxs qısa müddətdə müəyyən edilərək şübhəli şəxs qismində qandallanıb.

Faktla bağlı Gürcüstan Cinayət Məcəlləsinin 141-ci maddəsinin ikinci hissəsi (Azyaşlıya qarşı törədilən əxlaqsız hərəkətlər) ilə rəsmi cinayət işi başlanıb. Qanunvericiliyin bu bəndinə əsasən, təqsirləndirilən şəxsi 12 ilədək müddətə azadlıqdan məhrumetmə cəzası gözləyir. Hazırda istintaq prosesi davam edir.