Son 24 saatda ABŞ və İran ordusu arasında nələr yaşandı?

XEBER.GE xəbər verir ki, Hörmüz Boğazında gərginliyin artması tərəflərin qarşılıqlı hərbi əməliyyatları nəticəsində genişmiqyaslı müharibəyə çevrilib. ABŞ-ın İranın cənubundakı hərbi və iqtisadi obyektləri hədəf alan hava hücumlarına cavab olaraq, İslam İnqilabı Keşikçiləri Korpusu (SEPAH) bölgədəki Amerika üslərinə ballistik raketlər və PUA-larla zərbələr endirib.

ABŞ Mərkəzi Komandanlığı (CENTCOM), Kipr bayrağı altında üzən “GFS Galaxy” adlı konteyner gəmisinə edilən hücumu əsas gətirərək İranın cənub bölgələrinə qarşı bu həftə üçüncü böyük hava əməliyyatına başlayıb. Vaşinqton bu addımın İranın ticari gəmiçiliyi hədəf alma imkanlarını zəiflətmək və Hörmüz Boğazındakı mülki dəniz nəqliyyatına yönəlmiş təhdidləri aradan qaldırmaq məqsədi daşıdığını iddia edib. Əməliyyat zamanı hava hücumundan müdafiə radarları, raket anbarları, PUA anqarları və dənizçilik infrastrukturu hədəf alınıb.

Bombardmanlar zamanı təkcə hərbi mövqelər deyil, İran iqtisadiyyatı üçün həyati əhəmiyyət kəsb edən mülki obyektlər də vurulub. Hücumların qeydə alındığı dəqiq coğrafi nöqtələr və hədəflər bunlardır:

Çabahar Limanı və Bəndər Abbas Limanı: Pakistan və Çin ilə aparılan ticarətdə kilit rol oynayan bu strateji limanlar zərbələrin mərkəzində olub.

Buşəhr vilayəti: Bölgədə güclü partlayışlar qeydə alınıb.

Hörmüzqan vilayəti: Kritik rabitə və kommunikasiya infrastrukturları vurulub.

Sirik şəhəri: Şəhər yaxınlığındakı Taheroyi kəndində şiddətli partlayışlar baş verib.

Qeşm adası: Adanın ətraf ərazilərində güclü partlayış səsləri eşidilib.

Cask şəhəri: Şəhərin yaxınlığında üç ayrı partlayışın baş verdiyi hesabat edilib.

İranın cavabı

İran rəhbərliyi ABŞ-ın hücumlarına cavab olaraq üç mərhələdən ibarət “sərt” əks-həmlə həyata keçirdiyini elan edib. SEPAH tərəfindən Yaxın Şərqdəki ABŞ hərbi infrastrukturuna endirilən zərbələrin təfərrüatları aşağıdakı kimidir:

İordaniya: Şahzadə Həsən Hava Üssü raket və PUA-larla vurulub.

Qətər: ABŞ-ın bölgədəki ən böyük bazalarından biri olan Əl-Udeid Hava Bazası hədəf alınıb.

Küveyt: ABŞ-a məxsus Patriot hava hücumundan müdafiə sistemləri, sursat anbarları və PUA zərbələri ilə HIMARS raket batareyaları sıradan çıxarılıb.

Bəhreyn: Amerikalıların istifadə etdiyi hərbi rabitə və əlaqə obyektləri vurulub.

Oman: Əməliyyatın üçüncü mərhələsində Duqm Limanında yerləşən ABŞ-ın loqistika mərkəzləri və yanacaqdoldurma platformaları tamamilə məhv edilib.

İran Xarici İşlər Nazirliyi ABŞ-ın son 24 saatdakı hücumlarını ən kəskin şəkildə qınayaraq, mülki infrastrukturun hədəf alınmasını “iyrənc bir müharibə cinayəti” adlandırıb. Rəsmi Tehran bildirib ki, Vaşinqton bölgədə gərginliyi azaltmağa yönəlmiş bütün diplomatik səyləri iflic edib və beynəlxalq təhlükəsizliyi ciddi təhlükə altında qoyub.

İran rəsmi olaraq bəyan edib ki, bu hücumlar Hörmüz Boğazında naviqasiya təhlükəsizliyinə faktiki olaraq son qoyub və beynəlxalq ticarəti tamamilə dayandırıb. Tehran bölgə ölkələrinə xəbərdarlıq edərək, öz ərazilərini ABŞ hücumları üçün “plasdarm” (hücum meydançası) kimi istifadəyə verməməyə çağırıb və hücumların qaynağı olan hər bir nöqtənin qanuni hədəfə çevriləcəyini vurğulayıb. BMT-nin tərəflərə etdiyi “təmkinli olmaq” çağırışlarını “məsuliyyətsizlik” kimi qiymətləndirən İran, öz suverenliyini və ərazi bütövlüyünü hər bir şərt altında qoruyacağını elan edib.

mənbə: azshafaqna.com