Səudiyyə Ərəbistanı kabinetində ilk şiə nazirin təyinatı

Səudiyyə Ərəbistanının kralı Salman bin Əbdüləziz bu ölkənin investisiya naziri vəzifəsinə bir şiə şəxsiyyətini təyin edib.

Xeber.ge xəbər verir ki, kral Salman bin Əbdüləziz fərman imzalayaraq Fəhd bin Əbdülcəlil bin Əli Ali-Seyfi Səudiyyə Ərəbistanının investisiya naziri təyin edib.

Bundan əvvəl bu vəzifəni Xalid əl-Falih icra edirdi. Bildirilir ki, o, “Line” adlı nəhəng layihə barədə tənqidi fikirlər səsləndirdikdən və 2030 vizyonu ilə bağlı bəzi layihələrin iqtisadi əsaslandırılmasının zəiflədiyinə işarə etdikdən sonra müşavir-nazir və Nazirlər Şurasının üzvü təyin olunub.

Ali-Seyf 1976-cı ildə Şərqiyyə vilayətində anadan olub və Kral Fəhd Neft və Mədənlər Universitetində informasiya menecmenti ixtisası üzrə təhsil alıb. O, borc idarəçiliyi, investisiya və beynəlxalq maliyyələşdirmə sahələrində iyirmi ildən artıq təcrübəyə malikdir və 2021-ci ildən Səudiyyə Ərəbistanının Dövlət İnvestisiya Fondunun qlobal maliyyələşdirmə və investisiya strategiyası üzrə əsas bölmələrinə rəhbərlik edib.

O, Maliyyə Nazirliyinin Dövlət Borcunun İdarə Edilməsi Ofisinin qurucusu və Milli Borc İdarəetmə Mərkəzinin ilk baş direktoru olub, həmçinin Səudiyyə SABB Bankı və HSBC Səudiyyə Ərəbistanında yüksək rəhbər vəzifələrdə çalışıb.

Fəhd Al-Seyf eyni zamanda Neom, Aqua Power, Fars Körfəzi Beynəlxalq Bankı, Kral Abdullah İqtisadiyyatı Şəhəri, Kral Salman Hava Limanı İnkişaf Şirkəti və Gələcək İnvestisiya Təşəbbüsü Fondu kimi bir sıra mühüm qurumların idarə heyətlərinin üzvü və sədri olub.

Onun ən mühüm nailiyyətləri arasında yaşıl maliyyələşdirmə çərçivəsinin hazırlanması, bir dövlət sərvət fondu tərəfindən ilk 100 illik yaşıl istiqrazların buraxılması və iri layihələrin maliyyə mənbələrinin şaxələndirilməsi proqramlarına rəhbərlik etmək yer alır.

mənbə: iqna