“Lelo – Güclü Gürcüstan” bələdiyyə seçkilərində iştirak edəcək
Lelo – Güclü Gürcüstan” partiyası 4 oktyabrda keçiriləcək yerli özünüidarəetmə seçkilərində iştirak edəcəyini açıqlayıb.
Bu barədə partiyanın qərargahında xüsusi brifinq keçirilib.
Partiyanın baş katibi İrakli Kupradze bildirib ki, onlar “rus rejiminə qarşı daha bir əsas cəbhədə mübarizəyə qoşulurlar.”
“Bu gün ‘Güclü Gürcüstan’ koalisiyası öz bəyanatını verir. Biz rəsmi olaraq və açıq şəkildə mübarizəyə başlayırıq – Gürcüstanın hər bir vətəndaşı, hər bir insanın hüquqları, hər bir gəncin gələcəyi və yaşlıların rifahı üçün. Biz diktaturaya, rus rejiminə qarşı daha bir əsas cəbhədə döyüşə giririk.
Buradan bütün proqərb müxalifətinə müraciət edirəm – bizim bir ortaq məqsədimiz var: rus rejimini sona çatdırmaq. Bütün müxalifət partiyalarının seçiminə hörmət edirik, amma biz mübarizəni daha bir əlavə cəbhədə seçirik. Ən vacibi odur ki, bütün proqərb müxalifət partiyalarının məqsədi eynidir – rejimi məğlub etmək. Sadəcə strategiyalarımız fərqlidir.
Biz tam iştirak, tam əməkdaşlıq üçün hazırıq. İndiyə qədər olduğu kimi, total resursla küçə etirazına və aktiv müqavimətə qoşulmağa hazırıq. Bizim tərəfimizdən bu mübarizə və etiraz daha da güclənəcək. Eyni zamanda, proqərb müxalifətinə təklif edirik ki, bu mübarizələrdə bir-birimizi gücləndirək. Biz birliyə və koalisiya şəklində işləməyə hazırıq.
Cinayətdir bu seçkiləri sadəcə yerli seçkilər kimi təqdim etmək. 4 oktyabr de-fakto hakimiyyətə qarşı mübarizə, de-fakto seçkilərdə döyüşdür. Bu, Gürcüstanın hər bir vətəndaşının fərdi prosesi və rejimə qarşı hökmüdür. Rejimə qarşı bu mübarizə birlikdə qazanılmalıdır.
Biz bu mübarizədə nə Tbilisidə, nə də regionlarda bir qarış azadlıqdan imtina etməyi düşünmürük. Total müqavimətə, ‘Gürcü Arzusu’nun bizə qarşı törədəcəyi fiziki zorakılığa, repressiyalara, həbsə hazırıq. Artıq iki siyasi liderimiz həbsdədir – Mamuka Xazaradze və Badri Japaridze. Həmçinin Vepxia Kasradze və Vasil Kadzelashvili də həbsdədir. Komandamızdan neçə siyasi məhbus əlavə olunsa da, biz bu mübarizəni dayandırmayacağıq. Cavab aydındır – bu insanlar həbsdədir, çünki mübarizə aparıblar və geri çəkilməyiblər.
De-fakto hakimiyyətə qarşı, de-fakto seçkilərdə mübarizə elan edirik və ilk növbədə sizin – cəmiyyətin dəstəyinə güvənirik. Bu mübarizə sona qədər davam edəcək və birliyimiz olarsa, bu mübarizə qələbə ilə nəticələnəcək,” – deyə İrakli Kupradze bəyan edib.
mənbə: interpress
