Kobaxidze lari ilə bağlı açıqlama verdi
Siyasi vəziyyət sabitləşən kimi larinin məzənnəsi dərhal möhkəmlənməyə başladı.
Bu barədə Gürcüstanın baş naziri İrakli Kobaxidze hökumət administrasiyasında keçirilən mətbuat konfransında bildirib.
İrakli Kobaxidzenin sözlərinə görə, bu günlərdə kiçik müdaxilə lazım olub.
“Milli Bank heç bir əsaslı müdaxilə etmədən də lari məzənnəsinin sabitliyini təmin edə bilir və mən buna görə Milli Banka bir daha təşəkkür edərdim”, - deyə İrakli Kobaxidze bildirib.
Bundan əlavə, Kobaxidzenin fikrincə, “radikal müxalifətin yeganə məqsədi ölkəmiz üçün heç olmasa qısamüddətli iqtisadi problemlər yaratmaq idi, onlar hökuməti devirə bilmədilər, ancaq qısamüddətli problemlər yaratdılar”.
Birbaşa xarici investisiyaların rəqəmlərinin azaldılması ilə bağlı suala cavab olaraq o qeyd edib ki, ilin birinci yarısında çox yaxşı göstəricilər olub, üçüncü rüb isə sentyabr ayına qalıb, ona görə də investisiyaların azalmasının hökumətin qərarı ilə heç bir əlaqəsi yoxdur.
“İlin bir rübünün digərindən daha yaxşı olması normaldır. Ümumiyyətlə, bizdə çox yaxşı iqtisadi tendensiyalar var. Bu ilin on ayında bizdə düz 10 faiz iqtisadi artım var. Təbii ki, bu tendensiya qorunmalıdır. Bizim çox yaxşı iqtisadi göstəricilərimiz var və ona görə də bütün hökumətin diqqəti iqtisadi artım templərini nəinki qoruyub saxlamağa, hətta artırmağa yönələcək. Radikal müxalifətin yeganə məqsədi ölkəmiz üçün heç olmasa qısamüddətli iqtisadi problem yaratmaq idi. Hökuməti devirə bilmədilər, ancaq qısamüddətli problemlər yaratdılar. Əcnəbi Gürcüstanda müharibə imitasiyasını görəndə onun ölkəmizə səfər etmək və ya investisiya etmək motivasiyası azalır. Bununla belə, bu qısamüddətlidir. Eyni şey larinin məzənnəsində də oldu, bu vəziyyət olanda larinin məzənnəsi də pisləşdi, bizdə kiçik devalvasiya oldu, lakin vəziyyət sabitləşən kimi larinin məzənnəsi dərhal stabilləşməyə başladı.Eyni şey bütün digər istiqamətlərdə də olacaq. Radikal müxalifət öz ölkələrinə qarşı bu təxribatı dayandıran kimi hər şey sabitləşəcək. Buna görə də bizim heç bir xüsusi narahatlığımız yoxdur”, - deyə baş nazir bildirib.
mənbə: interpress
