"Kartu Bank" "TV Pirveli"-ni məhkəməyə verir
"TV Pirveli"nin məlumatına görə, "Kartu Bank" telekanala qarşı hüquqi iddia qaldırır və tələb edir ki, bank "İvanişvilinin bankı" və ya "oliqarxın bankı" kimi təqdim edilməsin.
"TV Pirveli"nin informasiya xidmətinin rəhbəri Nodar Meladze bildirib ki, bankın şikayət etdiyi reportaj xəbər buraxılışında efirə gedib və Avropa Xalq Partiyasının (EPP) qətnaməsinə əsaslanıb. Qətnamədəki tələblərdən biri də "Kartu Bank"ın beynəlxalq ödəniş sistemi — SWIFT-dən ayrılması idi.
Meladzeyə görə, bank həmin reportajın onlayn platformalarda yerləşdirilməməsini tələb edir. Görünür, bu məsələ bank üçün problematikdir və onlar məhkəmə yolu ilə mediada "İvanişvilinin bankı" və ya "oliqarxın bankı" kimi terminlərin qadağan olunmasını istəyirlər. Bank isə iddia edir ki, Bidzina İvanişvili ilə heç bir əlaqəsi yoxdur.
Meladzenin sözlərinə görə, "Kartu Bank" həmçinin bankın Müşahidə Şurasının sədri Nato Xaindravaya verilmiş bir sualı da mübahisələndirir: bank formal olaraq Bidzina İvanişvilinin oğlu — Uta İvanişvilinin adına rəsmiləşdirilib, amma bu formal ayrılıq gerçəkliyi dəyişirmi?
“Eyni zamanda bizə respondentlərin fikirlərinə görə də iddia qaldırırlar — yəni bank kimin adına keçirilsə də, əslində İvanişviliyə məxsus qalır. İddia edirlər ki, respondentlərin fikirləri adekvat olmayıb. Mən "TV Pirveli"yə qarşı hüquqi əsası olmayan çoxlu şikayətlər görmüşəm, lakin bu iş artıq başqa ölçüyə aiddir,” – deyə Nodar Meladze bildirib.
"TV Pirveli" bu şikayəti Bidzina İvanişviliyə qarşı gözlənilən sanksiyaların "Kartu Bank"a şamil olunmaması üçün atılmış addım kimi qiymətləndirir.
"Amma 'İvanişvilinin bankı' termini mübahisələndirilə bilməz, çünki bank Uta İvanişvilinin adına rəsmiləşdirilib, Uta da İvanişvilidir — deməli, yenə də İvanişvilinin bankıdır," – deyə Meladze əlavə edib.
Meladzenin məlumatına görə, "Kartu Bank" yalnız süjetdəki faktların təkzibini tələb edir, pul kompensasiyası istəmir.
"Kartu Bank"ın rəsmi saytına əsasən, bank "Kartu Qrupu" adlı səhmdar cəmiyyətə məxsusdur və öz növbəsində bu qrupun 35%-i Bidzina İvanişvilinin oğlu Uta İvanişviliyə, qalan 65%-i isə fiziki şəxslərə məxsusdur.
mənbə: marneulifm
