İran vətəndaşı böyük miqdarda narkotiklə saxlanıldı

Tbilisi Beynəlxalq Hava Limanında İran vətəndaşı böyük miqdarda psixotrop maddə ilə saxlanıldı

Xeber.ge xəbər verir ki, Gürcüstanın Daxili İşlər Nazirliyinin məlumatına görə, İran İslam Respublikasının vətəndaşı, 2003-cü il təvəllüdlü S.A. böyük miqdarda psixotrop maddənin – “Pregabalin” tərkibli həblərin qanunsuz əldə edilməsi, saxlanılması və ölkəyə qeyri-qanuni gətirilməsi ittihamı ilə həbs olunub.

Bildirilib ki, Tbilisi beynəlxalq hava limanında şübhəlinin əl yükünə baxış zamanı çoxlu sayda “Pregabalin” tərkibli psixotrop dərman vasitəsi aşkar edilərək maddi sübut kimi götürülüb. Polis əməkdaşları S.A.-nı hadisə yerində saxlayıblar.

Faktla bağlı Cinayət Məcəlləsinin 261 və 263-cü maddələri üzrə istintaq davam edir. Bu maddələr 13 ilədək azadlıqdan məhrumetməni nəzərdə tutur.