Didi Diqomi-Didube tramvay xəttinin inşasını Türkiyə şirkəti həyata keçirəcək

Tbilisi meri Kaxa Kaladzenin bəyanatına görə, paytaxtın nəqliyyat sistemində inqilabi yenilik hesab olunan Böyük Diqomi-Didube tramvay xəttinin layihələndirilməsi və inşası üzrə elan edilmiş tender başa çatıb. Tenderdə ən aşağı qiymət təklif edən Türkiyədə qeydiyyatdan keçmiş birgə müəssisə qalib gəlib.

XEBER.GE xəbər verir ki, Tbilisi hökumətinin iclasında çıxış edən mer layihənin detallarını və tender prosesini açıqlayıb:

"Böyük Diqomi-Didube tramvay xəttinin layihələndirilməsi və inşası tenderində Türkiyənin EYE (Emre Ray + Yüksel + Erk) birgə müəssisəsi qalib gəlib. Asiya İnkişaf Bankının (ADB) satınalma qaydalarına uyğun olaraq, hazırda 14 günlük şikayət müddəti təyin edilib. Bu müddət bitdikdən sonra qalib şirkətlə rəsmi müqavilə imzalanacaq", — deyə Kaxa Kaladze bildirib.

Tender çərçivəsində rəqabət əsasən Türkiyə və Çin şirkətləri arasında gedib. Merin sözlərinə görə, satınalma prosesində 3 Türkiyə və 1 Çin şirkəti iştirak edib.

Tramvay layihəsinin icrası ilə bağlı digər mühüm məqamlar:

Tramvay xəttinin layihəsi ümumilikdə 3 mərhələdən ibarətdir. Müqavilə imzalandığı gündən etibarən qalib şirkətə işləri tam başa çatdırmaq üçün 36 ay (3 il) vaxt veriləcək.

İlk tender hələ 2025-ci ilin oktyabrında elan edilmişdi və qalibin 2026-cı ilin yanvarında məlum olacağı gözlənilirdi. Lakin tender sənədlərində texniki parametrlərin və prosedurların korreksiyası zərurəti yarandığı üçün həmin proses dayandırılmışdı. Yeni və yekun tender isə

Tbilisidə tramvay xəttinin bərpası və inşası mer Kaxa Kaladzenin əsas seçkiqabağı vədlərindən biri olub. 2025-ci il avqustun 20-də paytaxt hökumətinin iclasında çıxış edən Kaladze Gürcüstanın müstəqillik tarixində ilk dəfə olaraq tramvay layihəsinin reallaşdırılacağını elan etmişdi.

Verilən məlumata görə, yeni tramvay xətti Didi Diqominin 3-cü və 4-cü mikrorayonlarının kəsişməsindən başlayacaq və Didube metrostansiyası istiqamətinə qədər uzanacaq.

Qeyd edək ki, Danimarkanın nüfuzlu konsaltinq şirkəti "Ramboll" tərəfindən 2023-cü ildə hazırlanan Tbilisi Nəqliyyatın İnkişafı Planında Böyük Diqomi rayonunun şəhər mərkəzi ilə bağlanması üçün ən optimal yol məhz tramvay xəttinin çəkilməsi kimi göstərilmişdi.