Trampın təşkilatı Tbilisidə Gürcüstanın ən hündür binasını tikməyi planlaşdırır

ABŞ-ın nüfuzlu "Wall Street Journal" (WSJ) nəşri Gürcüstanın paytaxtı Tbilisidə "Trump Tower" göydələninin inşası ilə bağlı iddialı layihənin detallarını dərc edib. Layihə reallaşacağı təqdirdə, bina paytaxtın ən hündür tikilisi olacaq.

APA-nın yerli bürosunun WSJ-yə istinadən verdiyi məlumata görə, layihədə iştirak edən tərəfdaş şirkətlərin nümayəndələri "Trump Tower Tbilisi" binasının təxminən 70 mərtəbədən ibarət olacağını bildiriblər.

Layihənin iştirakçıları və dizaynı:

Binanın dizaynı dünyaca məşhur "Gensler" memarlıq firması tərəfindən hazırlanıb.

Layihəyə "Archi Group" və "Biograf Living" şirkətlərini əhatə edən konsorsium cəlb olunub.

Tərəfdaşlar arasında Nyu-Yorkun "Sapir" developer şirkəti də yer alır.

ABŞ-ın keçmiş prezidenti Donald Trampın oğlu Erik Tramp məsələ ilə bağlı bildirib ki, Tbilisidə planlaşdırılan bu layihə şirkətin "qlobal səviyyədə tanınan mükəmməllik standartlarını" Gürcüstana gətirəcək.

 Qeyd edək ki, Gürcüstanda "Trump Tower" tikilməsi ideyası 2012-ci ilə təsadüf edir. O zaman layihənin Batumi şəhərində inşası nəzərdə tutulurdu və təqdimat mərasimində Gürcüstanın üçüncü prezidenti Mixail Saakaşvili ilə Donald Tramp şəxsən iştirak etmişdilər. Lakin sonradan Trampın təşkilatı maraqlar toqquşmasından qaçmaq üçün bir sıra xarici layihələrlə yanaşı, Batumi planını da təxirə salmışdı.

2017-ci ildə "Silk Road Group" və Bidzina İvanişvilinin təsis etdiyi "Həmtəsisçilik Fondu" Batumidə 250 milyon dollarlıq göydələnin öz vəsaitləri hesabına tikiləcəyini bəyan etmişdilər. Yeni Tbilisi layihəsi isə Trampın brendinin Gürcüstan paytaxtına genişmiqyaslı qayıdışı kimi qiymətləndirilir.