Svanetidə kripto-fermalara qarşı irimiqyaslı reydlər

Mestia bələdiyyəsində qanunsuz kriptovalyuta hasilatına (mayninq) qarşı Daxili İşlər Nazirliyi tərəfindən həyata keçirilən irimiqyaslı əməliyyatların davamı olaraq növbəti rəsmi məlumat yayılıb.

Xeber.ge xeber  verir ki,  Gürcüstan Daxili İşlər Nazirliyinin regional polis idarəsi Mestia bələdiyyəsində enerji resurslarından qanunsuz istifadə qaydalarının pozulması faktları üzrə başladılmış istintaq çərçivəsində əməliyyatları daha da genişləndirib.

Keçirilən növbəti kütləvi axtarışlar (çxreka) nəticəsində qanunsuz fəaliyyət göstərən növbəti gizli obyektlər ifşa olunub.

DİN-in yaydığı son rəsmi bəyanata görə, polislərin həyata keçirdiyi sonuncu reyd zamanı maddi sübut kimi daha 17 ədəd xüsusi kriptovalyuta istehsal edən qurğu — "mayner" müsadirə edilib. Qeyd olunub ki, son üç gün ərzində bölgədə aparılan fasiləsiz kompleks operativ-axtarış tədbirləri nəticəsində ümumilikdə 212 ədəd qanunsuz "mayner" dövlət tərəfindən ələ keçirilərək şəbəkədən kənarlaşdırılıb.

İstintaq materialları ilə təsdiq olunub ki, yerli sakinlər bu texniki avadanlıqlar vasitəsilə dövlət tərəfindən Svaneti bölgəsinə verilən pulsuz elektrik enerjisini külli miqdarda və qanunsuz (martlsavinaarmdeqo) şəkildə mənimsəyiblər.

Onlar sistemli olaraq rəqəmsal valyuta generasiya edərək qeyri-leqal yollarla böyük gəlirlər əldə edirmişlər.

Hüquq-mühafizə orqanları bəyan edir ki, bu cinayət şəbəkəsində iştirak edən, qanunsuz elektrik xətlərinin çəkilməsinə və mayninq fermalarının idarə olunmasına köməklik göstərən digər şəxslərin də şəxsiyyətinin müəyyənləşdirilməsi və onların barəsində müvafiq qanuni tədbirlərin görülməsi istiqamətində aktiv istintaq hərəkətləri davam etdirilir.

Xatırladaq ki, faktla bağlı Gürcüstan Cinayət Məcəlləsinin 229-cu prima maddəsinin 2-ci hissəsinin "b" bəndi (Enerji resurslarından istifadə qaydalarını qabaqcadan əlbir olan bir qrup şəxs tərəfindən pozma) ilə başladılan cinayət işi üzrə təqsirkar şəxsləri 3 ilədək müddətə azadlıqdan məhrumetmə cəzası gözləyir.