Şanidze küçəsindəki atışma: Nikoloz Kapanadze həbs edildi

Şanidze küçəsində 4 nəfəri güllələyən Nikoloz Kapanadzeyə ehtiyat tədbiri olaraq həbs cəzası təyin olunub.

XEBER.GE xeber  verir ki, qərarı hakim Lela Maridaşvili verib. Təqsirləndirilənin səhhəti ilə əlaqədar proses Aladaşvili klinikasında keçirilib. Onu bu gün həbsxanaya aparacaqlar.

Proses bitdikdən sonra prokuror Medea Tsiramua mediaya açıqlama verib:

“Prokurorluğun mövqeyi bu cinayəti törədən şəxsə qarşı bütün aspektlərdə ən sərt olacaq. Məhkəmə ittiham tərəfinin mövqeyini qəbul edib ki, yeni cinayət törətmə, sübutları məhv etmə və gizlənmə təhlükəsi var və ən sərt ehtiyat tədbiri – həbs tətbiq edib.

Psixi sağlamlıqla bağlı məlumat yalnız anasının ifadəsinə əsaslanır. Heç bir rəsmi tibbi sənəd təqsirləndirilənin hər hansı psixi xəstəliyini təsdiq etmir.”

Kapanadzeə ağırlaşdırıcı hallarda qəsdən adam öldürmə, 3 nəfərə qarşı qəsdən adam öldürmə cəhdi, polisə hücum cəhdi və odlu silahın qanunsuz gəzdirilməsi maddələri ilə ittiham irəli sürülüb.

İstintaq Cinayət Məcəlləsinin 19-109-cu maddəsi ilə aparılır və 20 ilədək və ya ömürlük azadlıqdan məhrum etmə cəzasını nəzərdə tutur.

Daxili İşlər Nazirliyinin məlumatına görə, hadisə 22 iyul saat 21:35 radələrində Akaki Şanidze küçəsi 31 yaxınlığında baş verib. Sözlü mübahisədən sonra Kapanadze avtomobilə minən gənclərin istiqamətinə atəş açıb. Nəticədə 3 gənc xəsarət alıb, onlardan biri – Nikoloz Qunaşvili klinikada vəfat edib. Bir qadın da baş nahiyəsindən xəsarət alıb.

23 iyul səhər saatlarında ev ünvanında polisə silahlı müqavimət göstərib. Polis onu tərksilah edərək saxlayıb.