Rustavidə xilasedicilər Kür çayında iki nəfərin meyitini tapıblar-VİDEO

Rustavidə, Kür çayında xilasedicilər iki kişinin meyitini tapıblar.

Xeber.ge xəbər verir ki, axtarış-xilasetmə əməliyyatı nəticəsində meyitlər Köhnə və Yeni Rustavini birləşdirən mərkəzi körpüdən bir neçə kilometr aralıda sudan çıxarılıb.

Mövcud məlumata görə, tapılan meyitlərdən biri mayın 31-də Aqmaşenebeli prospektinin yaxınlığındakı körpüdən Kür çayına tullanan 50 yaşlarında olan kişiyə məxsusdur.

Hadisədən dərhal sonra Fövqəladə Halların İdarə Edilməsi Xidmətinin xilasediciləri və dalğıcları fasiləsiz rejimdə axtarış işləri həyata keçirirdilər.

Çaydan çıxarılan ikinci meyitə gəlincə, ilkin versiyaya görə, onun Tbilisidə itkin düşmüş bir nəfərə məxsus olduğu və çayın axını ilə Rustavi ərazisinə qədər gəlib çıxdığı ehtimal olunur. Hazırda hər iki şəxsin meyiti ölümün dəqiq səbəbinin müəyyən edilməsi üçün ekspertiza bürosuna (morqa) təhvil verilib.

Hadisə yerinə Fövqəladə Halların İdarə Edilməsi Xidmətinin və kriminal polisin heyətləri səfərbər olunub. Hüquq-mühafizə orqanları faktla bağlı araşdırmaları davam etdirir.