Mobil Tətbiq
Papuaşvili Estoniya səfirini təhsil islahatına müdaxilə etməkdə ittiham edib
Gürcüstan parlamentinin sədri Şalva Papuaşvili bildirib ki, Estoniya səfiri ölkədəki təhsil islahatı məsələsinə kobud şəkildə müdaxilə edərək, açıq-aşkar islahat əleyhdarlarını dəstəkləyir.
Xeber.ge xəbər verir ki,
"Bütün sinizm ondan ibarətdir ki, hazırda Gürcüstanda həyata keçirilən islahat əslində Estoniya modelidir və Gürcüstan ali təhsili bu modelə doğru irəliləyir. Estoniya səfiri isə Gürcüstanın Estoniya modelinə keçidinə hücum edir. Bilmirəm, bəlkə də Estoniya səfirinin öz ölkəsindəki ali təhsil sistemi xoşuna gəlmir", – deyə Papuaşvili jurnalistlərin suallarını cavablandırarkən bildirib.
Parlament sədrinin sözlərinə görə, Estoniya səfirinin təhsil islahatı məsələsinə bu dərəcədə kobud və sinik şəkildə müdaxilə etməsi gülüncdür.
"Estoniyanın Ermənistandakı gələcək səfirinin – hansı ki, hələ buradadır, lakin artıq özünü Estoniyanın Ermənistandakı səfiri hesab etdiyini bilirik – təhsil islahatı məsələsinə çox kobud və sinik şəkildə müdaxilə etməsi tamamilə gülüncdür", – deyə Papuaşvili vurğulayıb.
Söhbət Estoniya hökumətinin 2024-cü ildən bu vəzifəni tutan səfir Marge Mardisalu-Kaxarı Ermənistana köçürmək qərarından gedir. O, martın 10-dan Gürcüstandakı fəaliyyətini dayandırır və Estoniya səfirliyinin açılmasının planlaşdırıldığı Ermənistana işə keçir. Estoniyanın Gürcüstandakı diplomatik missiyasına müvəqqəti işlər vəkili rəhbərlik edəcək.
Gürcüstan parlamentinin sədri həmçinin qeyd edib ki, Estoniya hakimiyyəti 102 Gürcüstan vətəndaşını – "hökumətin, parlamentin və məhkəmənin demək olar ki, yarısını" – "persona non qrata" elan edib. "Bu, əlbəttə ki, düşmənçilik addımıdır", – Papuaşvili əlavə edib.
Ali təhsil müəssisələrinin genişmiqyaslı islahatı çərçivəsində hakimiyyət Gürcüstanın dövlət universitetlərində yerlərin sayını açıqlayıb. Ümumi sayın artmasına baxmayaraq, bir sıra ixtisaslar üzrə yerlərin sayı əhəmiyyətli dərəcədə azalıb. İxtisarlar ən çox İliya Universitetinə təsir edib. Hökumətdən bildirilib ki, düzəlişlər əmək bazarının təhlilindən sonra edilib.
2026-cı ildən dövlət yeni sistem tətbiq edir ki, buna əsasən dövlət ali məktəblərində təhsil ödənişsiz olacaq, universitetlərin özləri isə əsasən dar ixtisaslaşmış müəssisələrə çevriləcək. Bundan əlavə, dövlət universitetləri xarici tələbə qəbul edə bilməyəcək. Bakalavr dərəcəsi almaq üçün təhsil müddəti üç il, magistr dərəcəsi üçün isə bir il olacaq. Doktoranturada təhsilini davam etdirmək istəyənlər magistraturada əlavə bir il oxumalı olacaqlar.
