Daxili İşlər Nazirliyi “oğru aləmi” ilə əlaqəli 20 nəfəri saxlayıb- Video

Gürcüstanın Daxili İşlər Nazirliyi “oğru aləmi” ilə əlaqəsi olan 20 nəfəri saxlayıb.

Bu barədə nazir müavini Aleksandre Daraxvelidze brifinqdə məlumat verib.

Onun sözlərinə görə, daha 4 nəfərə, o cümlədən iki “qanuni oğruya”, qiyabi ittiham irəli sürülüb.

İstintaqla müəyyən olunub ki, saxlanılan şəxslər şəxsi maraqlar naminə vətəndaşlar arasında maliyyə mübahisələrinin həllinə cəlb olunublar. Məlum olub ki, mübahisəli tərəflərin iştirakı ilə Gürcüstan və Türkiyədə “oğru aləmi” qaydaları ilə sözdə münaqişə həll tədbirləri keçirilib.

Əməliyyat tədbirləri və istintaq hərəkətləri Tbilisi, Şida Kartli, Acarıstan, Quriya, İmereti və Kaxeti bölgələrində aparılıb. Saxlanılan şəxslər sırasında tanınmış ləqəblərə malik şəxslər də var: “Kokoşka”, “Parexela”, “Uçxlo”, “Belesha”, “Caga”, “Çinela”, “Stalina”, “Foxre” və başqaları.

Qiyabi ittiham olunanlar arasında xaricdə yaşayan “qanuni oğrular” – 1970-ci il təvəllüdlü Tengiz Xoperia (“Çinka”) və İrakli Lejava (“Lazare”) da var. Onlarla yanaşı, “oğru aləmi”nə üzvlük və hədə-qorxu yolu ilə pul tələb etmək ittihamı ilə 1993-cü il təvəllüdlü, Interpol tərəfindən axtarışda olan E.M.-ə də ittiham irəli sürülüb.

İstintaq zamanı məlum olub ki, “qanuni oğrular” tərəflər arasında qərar qəbul edir və bir tərəfə digərinə və ya özlərinə pul ödəmək öhdəliyini qoyurdular. Müəyyən olunmuş vaxtda ödəniş edilmədikdə isə zorakılıq və ölüm hədəsi ilə təhdid olunurdu.

Polis əməliyyatları zamanı saxlanılan şəxslərin evlərindən və şəxsi əşyalarından kompüterlər, mobil telefonlar, müxtəlif növ narkotik vasitələr və odlu silahlar götürülüb.

İstintaq Gürcüstan Cinayət Məcəlləsinin 223¹-ci maddəsinin 1-ci və 2-ci hissələri (qanuni oğru və üzvlük), 223³ maddəsinin 2-ci hissəsi (dəstək), 223⁴ maddəsinin 1-ci hissəsi (müraciət), eləcə də 181-ci maddənin 2-ci hissəsi (hədə-qorxu ilə pul tələb etmə) ilə aparılır. Bu cinayətlər 15 ilədək azadlıqdan məhrumetmə cəzasını nəzərdə tutur.

mənbə: interpress