Bələdiyyə İnspeksiyası hava limanı ətrafında qanunsuz tikilinin sökülməsini həyata keçirib

Bələdiyyə İnspeksiyası hava limanı ətrafında qanunsuz tikililərin sökülməsini həyata keçirib.

Bu barədə Tbilisinin meri Kaxa Kaladze hökumətin bu gün keçirilən iclasında bəyan edib.

Kaladzenin sözlərinə görə, dövlət torpaqlarının kütləvi şəkildə zəbt olunmasının daha bir faktı Tbilisi Beynəlxalq Hava Limanının yaxınlığında, aerodromun məhdudlaşdırılmış zonasının və xüsusi tənzimləmə ərazisinin hüdudlarında aşkarlanıb.

Kaladze bildirib ki, torpaq zəbtinin arxasında imkanlı şəxslər dayanır:

"Yəqin yadınızdadır, dövlət torpaqlarında icazəsiz tikililərin inşa olunması halları var idi, bu isə çox ciddi problemdir. Bizdə müxtəlif proqramlar var və həmin proqramlar çərçivəsində evsiz statusuna malik ailələrə yaşayış sahəsi təqdim olunur. Dövlət torpaqlarının zəbt olunması və qanunsuz tikililərin həyata keçirilməsi tamamilə yolverilməzdir.

Biz faktlar qeydə aldıq və ictimaiyyətə məlumat verdik ki, əsasən belə hallar arxasında şəhərdə biznesləri olan, bir neçə mənzilə və bölgələrdə böyük torpaq sahələrinə sahib şəxslər durur. Çox vaxt belə şəxslər aztəminatlı ailələrdən pərdə kimi istifadə edirdilər. Buna görə də dövlət torpaqlarının zəbt olunması və qanunsuz tikililərin aparılması tamamilə yolverilməzdir", – deyə Kaladze bildirib.

Tbilisi merinin sözlərinə görə, aşkarlanmış qanun pozuntusuna cavab olaraq, Bələdiyyə İnspeksiyası dərhal reaksiya verib və ərazidə qanunsuz yerləşdirilmiş tikililəri söküb.

mənbə: marneulifm