Şərqi Gürcüstanda güclü qar və çovğun gözlənilir

Gürcüstan Milli Ətraf Mühit Agentliyi yaxın sutka üçün gözlənilən əlverişsiz hava şəraiti ilə bağlı əhaliyə xəbərdarlıq edib.

Xeber.ge xəbər verir ki, fevralın 11-də Şərqi Gürcüstanda yağıntılı hava şəraiti gözlənilir. Bəzi yerlərdə yağıntıların intensiv olacağı, əsasən qar şəklində düşəcəyi bildirilir. Sinoptiklər duman, güclü çovğun və yolların buz bağlayacağı barədə xəbərdarlıq ediblər. Yüksək dağlıq rayonlarda isə qar uçqunu təhlükəsi mövcuddur.

Qeyd olunub ki, güclü qar yağışı, görmə məsafəsinin azalması, çovğun və buzlanma səbəbindən avtomobil yollarının ayrı-ayrı hissələrində nəqliyyatın hərəkətinə məhdudiyyətlər qoyula bilər.

Sürücülərə və vətəndaşlara ehtiyatlı olmaq, xüsusilə dağlıq istiqamətlərdə hərəkət edərkən mövcud qaydalara riayət etmək tövsiyə olunur.