Polşaya işləməyə gedən Gürcüstan vətəndaşları üçün yeni qaydalar

Gürcüstan, Kolumbiya və Venesuela vətəndaşlarının iş məqsədilə Polşaya giriş qaydaları sərtləşdirilib.

XEBER.GE xeber  verir ki, Polşa Xarici İşlər Nazirliyinin müvafiq qərarı artıq qüvvəyə minib. Yeni qaydalar yalnız ölkəyə işə düzəlmək məqsədilə gələn şəxslərə şamil olunur.

Polşa hökumətinin bildirdiyinə görə, bu üç ölkənin vətəndaşları vizasız rejimdən sistematik şəkildə istifadə edərək qanunvericiliyin tələblərinə cavab vermədən işləyiblər.

Polşada Gürcüstandan olan əmək miqrantlarının sayının da artıq azalmağa başladığı bildirilir.

Polşa hakimiyyətinin məlumatına əsasən, ölkədə 27 minə qədər Gürcüstan vətəndaşı istehsalat, tikinti, logistika, xidmət sahələrində, eləcə də taksi sürücüsü kimi çalışıb.

Qeyd: Bu dəyişiklik Gürcüstan vətəndaşlarının Polşaya ümumiyyətlə vizasız gedə bilməməsi demək deyil. Məhdudiyyət məhz iş məqsədilə girişə aiddir.