Marneulidə bir nəfərə qarşı zorakılıq edən üç nəfər saxlanıldı- VİDEO
Kvemo Kartli Polis İdarəsinin Marneuli Rayon Şöbəsi əməkdaşları tərəfindən keçirilən təxirəsalınmaz əməliyyat və istintaq tədbirləri nəticəsində üç nəfər saxlanılıb.
Bu barədə Gürcüstan Daxili İşlər Nazirliyi məlumat yayıb.
Məlumatına görə, 2002-ci il təvəllüdlü G.M., 2002-ci il təvəllüdlü S.B. və 1994-cü il təvəllüdlü E.T. qrup halında zorakılıq və azadlıqdan qanunsuz məhrum etmə ittihamı ilə tutulublar.
Məlumata əsasən, cinayət sübuta yetiriləcəyi halda, onlara 7 ildən 10 ilədək azadlıqdan məhrumetmə cəzası gözlənilir.
İstintaqla müəyyən edilib ki, Marneuli rayonunun kəndlərindən birində təqsirləndirilən şəxslər maliyyə mübahisəsinə görə 1991-ci il təvəllüdlü D.A.-ya fiziki zor tətbiq ediblər, onu avtomobilin baqajına yerləşdirərək azadlığını məhdudlaşdırıblar və çaya tərəf aparıblar. Lakin zərərçəkmiş baqajı açaraq qaça bilib.
Polis əməkdaşları keçirilən əməliyyat-axtarış tədbirləri nəticəsində hər üç nəfəri cinayəti törətməkdə şübhəli şəxs qismində isti izlərlə saxlayıb.
Faktla bağlı Gürcüstan Cinayət Məcəlləsinin 126-cı maddəsinin birinci prim “b” bəndi və 143-cü maddəsinin üçüncü hissəsinin “a” bəndi ilə istintaq aparılır.
mənbə: interpress
