Komitə “Gürcüstan Naminə” partiyasının deputatlarının səlahiyyətlərinin vaxtından əvvəl dayandırılmasını müzakirə edəcək

İyunun 30-da İvanişvilinin parlamentində Prosedur və Hüquqi Məsələlər üzrə Komitə “Qaxaria – Gürcüstan Naminə” partiyasının deputatları üçün mandatların vaxtından əvvəl dayandırılması məsələsini müzakirə edəcək.

Mövcud məlumata görə, bu məsələ deputatların parlament iclaslarını üzrlü səbəb olmadan buraxması əsasında gündəliyə daxil edilib.

“Bu günə qədər olan məlumata əsasən, onların iclasları buraxması üzrsüz səbəblərlə əlaqəlidir, lakin məsələ komitə tərəfindən yoxlanılacaq. Komitə 12 nəfərin hər birinin iştirakını araşdıracaq və parlamentin reqlamentinin pozulub-pozulmadığını müəyyən edəcək. Yoxlamadan sonra nəticəyə əsasən müvafiq rəy hazırlanacaq”, – deyə İvanişvilinin nümayəndəsi və Prosedur Məsələləri Komitəsinin sədri David Matikaşvili [IPN-in məlumatına əsasən] bildirib.

Qeyd edək ki, “Qaxaria – Gürcüstan Naminə” partiyası parlamentdə 12 deputatla təmsil olunur. Qiorqi Qaxaria-nın partiyası (digər müxalifət partiyaları kimi) 2024-cü il 26 oktyabr seçkilərini qeyri-legitim hesab edir və parlament fəaliyyətində iştirak etmir. Həmçinin “Gürcüstan Naminə” partiyası deputat mandatlarının ləğv edilməsi ilə bağlı İvanişvilinin parlamentinə heç bir rəsmi müraciət etməyib.

Bundan əlavə, Qiorqi Qaxaria Tsulukiani Komissiyasına iyulun 2-də yenidən çağırılacaq. Bu barədə İvanişvilinin nümayəndələri Komissiyada onun gəlməməsi fonunda müzakirə aparıblar və Komissiyanın iş qrafikinə uyğun olaraq Qaxaria-ya mümkün olan ən son tarix təklif olunacaq.

mənbə: marneulifm