Gürcüstanda İnterpol xətti ilə axtarışda olan Türkiyə vətəndaşı saxlanılıb

Gürcüstan Daxili İşlər Nazirliyinin Mərkəzi Krimnal Polisi Departamentinin Acarıstan Baş İdarəsi və Miqrasiya Departamentinin Qərbi idarəsinin əməkdaşları tərəfindən birgə əməliyyat keçirilib.

Xeber.ge xəbər verir ki, DİN-in yaydığı bəyanatda bildirilir ki, əməliyyat nəticəsində İnterpol tərəfindən "qırmızı bülleten"lə beynəlxalq axtarışa verilmiş, 2003-cü il təvəllüdlü Türkiyə Respublikası vətəndaşı R.S. saxlanılıb.

Qeyd olunub ki, saxlanılan şəxs Türkiyə hüquq-mühafizə orqanları tərəfindən elektron məlumatların işlənməsi sistemlərindən istifadə etməklə dələduzluq törətməkdə ittiham olunaraq axtarışa verilib.

Hüquq-mühafizə orqanlarının Batumidə keçirdiyi tədbirlər nəticəsində yaxalanan R.S. barəsində hazırda qanunvericiliyə uyğun olaraq ekstradisiya prosedurları davam etdirilir.