Batumidə keçmişdə məhkum olunmuş qadın vətəndaşın 171 min larisini mənimsəyib

Gürcüstanın Daxili İşlər Nazirliyinin (DİN) Acarıstan Polis Departamentinin Batumi Şəhər İdarəsinin əməkdaşları külli miqdarda pul vəsaitini dələduzluq yolu ilə mənimsəməkdə şübhəli bilinən, keçmişdə məhkum olunmuş qadını saxlayıblar.

XEBER.GE xəbər verir ki, DİN-in yaydığı məlumata görə, saxlanılan şəxs vətəndaşı aldadaraq onun etibarından sui-istifadə edib.

Aparılan istintaq tədbirləri nəticəsində dələduzluq sxeminin detalları məlum olub:

Təqsirləndirilən qadın zərərçəkmiş vətəndaşı Batumidə yaşayış mənzili almağa və həmin mənzildə təmir işləri təşkil etməyə kömək edəcəyinə inandırıb.

Bu bəhanə ilə o, vətəndaşdan müxtəlif vaxtlarda hissə-hissə ümumilikdə 171 000 lariyədək pul alaraq qanunsuz şəkildə özününküləşdirib.

Hüquq-mühafizə orqanları tərəfindən həyata keçirilən operativ-axtarış tədbirləri nəticəsində şübhəli şəxs hakim qərarı əsasında rəsmi olaraq saxlanılıb.

Faktla bağlı Gürcüstan Cinayət Məcəlləsinin 180-ci maddəsi (külli miqdarda ziyan vurmaqla törədilən dələduzluq) ilə istintaq aparılır. Bu maddə üzrə təqsirli bilinən şəxsi 10 ilədək müddətə azadlıqdan məhrumetmə cəzası gözləyir.