Tbilisidə və Sameqreloda fahişəliyə şərait yaratmaq ittihamı ilə 12 nəfər saxlanıldı - VİDEO

Aug 27, 2025 - 13:53

0 31

Fahişəliyə şərait yaratmaq və bu məqsədlə məkanların ayrılması faktı üzrə keçirilən əməliyyatlar nəticəsində 12 nəfər saxlanılıb.

Bu barədə Gürcüstan Daxili İşlər Nazirliyi (DİN) məlumat yayıb.

Onların arasında həm Gürcüstan, həm də Çin vətəndaşları var.

Mərkəzi Kriminal Polis Departamentinin İnsan alveri və qanunsuz miqrasiya ilə mübarizə idarəsinin rəisi Tornike Marsagişvilinin sözlərinə görə, istintaq və məhkəmə qərarına əsaslanan əməliyyat tədbirləri Tbilisidə və Sameqrelo bölgəsində aparılıb. Əməliyyat nəticəsində 13 obyekt bağlanıb.

İstintaqla müəyyən olunub ki, obyektlərin menecerləri və administratorları qadınlara fahişəliklə məşğul olmaları üçün yerlər verib, həmçinin müştəri tapmaqda köməklik göstəriblər. Bunun müqabilində qadınlar qazandıqları gəlirdən onlara pul ödəyiblər. Obyektlərin əsas gəlir mənbəyini də məhz bu fəaliyyət təşkil edib.

Polis tərəfindən aparılan axtarış zamanı fahişəliyə şərait yaratmaq yolu ilə əldə edilmiş pul vəsaitləri maddi sübut kimi götürülüb.

Faktla bağlı Gürcüstan Cinayət Məcəlləsinin 254-cü maddəsi üzrə istintaq aparılır. Bu maddə fahişəliyə şərait yaratma və bu məqsədlə məkan ayırma cinayətini nəzərdə tutur və 4 ilə qədər azadlıqdan məhrumetmə cəzası ilə cəzalandırılır.