Qəzzalı 4 bacı hafizi-Quran oldu

Fələstinli 3 bacı Qurani-Kərimi tam şəkildə əzbərləyib.

Xeber.ge xəbər verir ki, Qəzza sakinləri olan 20 yaşlı Həlanın, 17 yaşlı Əlmanın və 15 yaşlı Səmanın müəlliməsi onların 22 yaşlı böyük bacısı Nədadır.

Nəda özü 2023-cü ildə hafizi-Quran olmağı bacarıb və hazırda Quran dərsləri keçir.

3 bacı əzbərləmə prosesinə 2024-cü ilin yanvarında başlayıblar. Nəda onlar üçün xüsusi gündəlik proqramlar tərtib edib.

Onlar amansız müharibə, aclıq və digər çətinliklərə baxmayaraq hər gün intizamlı şəkildə dərsləri ilə məşğul olublar.

Bu müddət ərzində onlar İsrailin bombardmanları və soyqırımı siyasəti nəticəsində ilk olaraq Xan-Yunisdən Rəfaha, sonra isə Rəfahdan əl-Məvasiyə köçməli olublar. Onlar sadə çadırda yaşayıblar və yaşayırlar.

Həla deyir ki, onlar məcburi köçə, aclığa, hücumlara və isti hava şəraitinə məruz qalsalar da, bir-birilərinə dəstək veriblər və geri addım atmayıblar.

Səma əlavə edib ki, müharibə onların qətiyyət və əzmini əsla sındıra bilməyib.

“Bizim məktəbimiz, məscidimiz və gözəl həyatımız var idi. Sonra müharibə başladı və (İsrail) hər şeyi məhv etdi. Lakin qətiyyət və israrlılığın sayəsinddə biz bütün Quranı əzbərləyə bildik”, – deyə o qeyd edib.

Əlma isə hifz səyahətini həyatının ən çətin səfəri adlandırıb. Çünki müharibəyədək Quran dərsləri məscidlərdə keçirilirdi, indi isə ən çətin vəziyyət və şərait içərisində.

“Qışda olduqca soyuq idi, yayda isə dözülməz dərəcədə isti. Lakin indi bizim evimizdə, ailəmizdə dörd hafizi-Quran var və bu, təsvirolunmaz bir hisdir”, – deyə o vurğulayıb.

Ata Kamil Muhəmməd əl-Məsri qızlarının nailiyyəti ilə bağlı öz sevincini ifadə edib.

“Hiss edirəm ki, sanki bütün dünyanın sahibiyəm. Bu uğur, hər şeydən öncə, Allahın lütfüdür”, – deyə o qeyd edib.

O, böyük qızı Nədaya digər bacılarına müəllimlik etdiyi üçün minnətdarlığını da bildirib.

mənbə: az.shaqna