Goridə dəmir yolundan kabel oğurlayan 4 şəxs cinayət başında saxlanıldı

Gori bələdiyyəsində qrup halında oğurluq törətməkdə şübhəli bilinən 4 şəxs hüquq-mühafizə orqanları tərəfindən saxlanılıb.

Daxili İşlər Nazirliyinin yaydığı rəsmi məlumata görə, təqsirləndirilən şəxslər dəmir yolu xəttinə ziyan vuraraq mis kabelləri mənimsəməyə cəhd ediblər.

XEBER.GE xəbər verir ki, polis əməkdaşları şübhəliləri oğurluq əmlakı daşımaq istəyərkən cinayət üstündə ələ keçiriblər.

Təqsirləndirilən şəxslər Gori bələdiyyəsinin kəndlərindən birinin yaxınlığından keçən dəmir yolu magistralından kəsərək gizli şəkildə 300 metrə yaxın mis kabeli mənimsəyiblər.

Hüquq-mühafizə orqanlarının əməkdaşları şübhəli şəxsləri oğurladıqları kabelləri avtomobilə yükləyən zaman saxlayıblar.

"Gürcüstan Dəmir Yolları" ASC-yə məxsus mis kabellər polis tərəfindənmaddi sübut kimi götürülüb.

İstintaq Gürcüstan Cinayət Məcəlləsinin 177-ci maddəsinin 3-cü hissəsi (Qrup halında törədilən oğurluq) ilə davam etdirilir.

Bu maddə qanunvericiliyə əsasən 7 ilədək müddətə azadlıqdan məhrumetmə cəzasını nəzərdə tutur.