"EuroBasket 2025" - Gürcüstan Avropa çempionu İspaniyanı məğlub etdi
Gürcüstanın yığması “EuroBasket 2025″in ilk oyununu İspaniyaya qarşı keçirdi və hazırkı Avropa çempionunu çox inamlı, 83:69 hesabı ilə məğlub etdi.
Gürcüstan “EuroBasket”lərin altı açılış oyunundan dördünü qalib başa vurub. 2011-ci ildə Belçikanı, 2013-cü ildə Polşanı, 2017-ci ildə Litvanı, 2025-ci ildə isə İspaniyanı məğlub edib.
Avropa Çempionatından əvvəl Gürcüstanın yığması arzuolunmaz vəziyyətə düşdü, komandanın kapitanı Tornike Şenqelia aritmiyaya görə iki həftə istirahət etdi. Onun İspaniyaya qarşı oynaması son ana qədər sual altında idi. Lakin, həkimlər ona icazə verdilər və onu da start heyətində gördük – Bolduin, Sanadze, Mamukelaşvili, Şenqelia, Bitadze.
Oyundan əvvəl mətbuat konfransında ispanların baş məşqçisi Serjio Skariolo dedi – Gürcüstan boyda da, çəkidə də bizdən üstündür, onları səbətin altında dayandırmaq bizim üçün çətin olacaq. Bu, bir tərəfdən komandamızın ünvanına xoş kompliment idi, lakin reallığa çevrildi.
Gürcüstan səbət altında rəqibdən həqiqətən həm hücumda, həm də müdafiədə daha yaxşı idi. Təcrübəli uzunboylu ispan oyunçular səbət altına daxil olmaqda və xal toplamaqda çox çətinlik çəkirdilər.
Skariolonun yetirmələri perimetrdən fayda əldə etməyə çalışırdılar, lakin Gürcüstan müdafiədə perimetrdə də yaxşı çıxış edirdi.
