Qardabanidə gənc qadını amansızlıqla öldürən 37 yaşlı kişi saxlanılıb-VİDEO

Gürcüstanın Qardabani bələdiyyəsində ağır cinayət baş verib. Daxili İşlər Nazirliyi 25 yaşlı qadının qətlində ittiham olunan 37 yaşlı həyat yoldaşının saxlanılması barədə məlumat yayıb.

Xeber.ge xəbər verir ki, təqsirləndirilən F.A. soyuq silahdan istifadə edərək həyat yoldaşı, 2000-ci il təvəllüdlü M.Q.-yə çoxsaylı bıçaq xəsarətləri yetirib. Gənc qadın aldığı ağır xəsarətlər nəticəsində hadisə yerində dünyasını dəyişib.

Hüquq-mühafizə orqanları tərəfindən saxlanılan F.A.-dan cinayət aləti olan bıçaq maddi sübut kimi götürülüb.

Faktla bağlı Gürcüstan Cinayət Məcəlləsinin 11 (prim) 109-cu maddəsinin "k" bəndi (ailə üzvünü xüsusi amansızlıqla qəsdən öldürmə) ilə istintaq aparılır. Saxlanılan şəxsi 20 ilədək və ya ömürlük azadlıqdan məhrumetmə cəzası gözləyir.