City Mall ətrafında yol hərəkəti sxemi dəyişir Yeniliklər hansılardır

Tbilisi şəhər meriyası Saburtaloda, "City Mall" yaxınlığında hərəkət sxemini dəyişir – ticarət mərkəzinin ətrafındakı ərazidə nəqliyyat qovşağının rekonstruksiyası həyata keçirilir.

XEBER.GE xeber  verir ki, işlər başa çatdıqdan sonra yol hərəkəti sxemi belə olacaq:

"Delisi" metro stansiyasından "City Mall" istiqamətində hərəkət edərkən, mollun yanındakı əsas yolayrıcında birinci döngədən sola dönməklə hərəkət həm Kavtaradze küçəsinə, həm də Kazbek prospekti istiqamətinə mümkün olacaq.

İkinci döngə Vaja-Pşavela prospektindən moll istiqamətində hərəkət edən nəqliyyat vasitələri üçün nəzərdə tutulacaq.

"Vaja-Pşavela" metro stansiyası tərəfdən Kazbek prospekti istiqamətində hərəkət "City Mall" yaxınlığındakı birinci döngədən sağa dönməklə mümkün olacaq, bundan sonra nəqliyyat vasitələri sola dönərək Kazbek prospektinə çıxacaqlar. Bu döngədən avtomobillər Kavtaradze küçəsi istiqamətində hərəkətlərini davam etdirə bilməyəcəklər, lakin bələdiyyə nəqliyyatı ehtiyac yaranarsa Kavtaradze küçəsinə keçə biləcək.

Eyni zamanda, Vaja-Pşavela prospektində Tavxelidze küçəsindən "City Mall" istiqamətində ictimai nəqliyyat zolağı quraşdırılır. Hər iki istiqamətdə ikitərəfli hərəkət zolaqları saxlanılacaq.

"City Mall" yaxınlığındakı meydanda işıqforla tənzimlənən piyada keçidləri quraşdırılır ki, onlar da ictimai nəqliyyat dayanacağı ilə əlaqələndirilib. Meydanda dayanacaq yerləri saxlanılacaq, onların yerləşməsi yeni sxemə uyğun olaraq dəyişdirilir.

Bununla əlaqədar olaraq meriya planlaşdırılan dəyişikliklərin ətraflı izah olunduğu məlumatlandırıcı videoçarx yayımlayır.