Bokuçavanın dedikləri istedadsız tamaşadır

Parlamentin birinci vitse-spikeri Gia Volski Tina Bokuçavanın həyat yoldaşı Kote İoselianinin oğurlanması barədə açıqlamasına münasibət bildirib.

Onun sözlərinə görə, bu “istedadsız tamaşa” olmaqla yanaşı, eyni zamanda “Vahid Milli Hərəkat”a xas olan şər və qərəzin göstəricisidir.

“Bu, bir növ pis nağıldır. Məqsəd isə Dövlət Təhlükəsizlik Xidmətini və Daxili İşlər Nazirliyini aşağılamaqdır. İddialar üzrə istintaq başlanmalıdır. Kotenin özü də dindirilməlidir”, – deyə Volski vurğulayıb.

O, İoselianinin əvvəllər etdiyi bəzi qalmaqallı bəyanatları da xatırladıb və Bokuçavanın bəyanatlarını "böyük iftira və reallıqdan uzaq hücum" kimi dəyərləndirib.

“Bokuçavanın iddiaları ilə güya yeni nazirə və təhlükəsizlik xidmətinin rəhbərliyinə hücum edilir. Xatırlayıram, bir neçə gün əvvəl Gegeliyə də guya hücum olmuşdu. Bu iddialar kimsəyə inandırıcı gəlməyəcək, yalnız sadəlövh insanlar buna inanacaq”, – deyə Volski əlavə edib.

Xatırladaq ki, “Vahidlıq – Vahid Milli Hərəkat”ın sədri Tina Bokuçava bildirmişdi ki, həyat yoldaşı Kote İoselian yaşayış binasının yaxınlığında beş maskalı şəxs tərəfindən oğurlanaraq naməlum istiqamətə aparılıb və səkkiz saat boyunca fiziki və psixoloji təzyiqə məruz qalıb. Onun sözlərinə görə, İoselian uşaqlarının təhlükəsizliyi ilə hədələnib və təzyiq nəticəsində Uta İvanişviliyə ünvanlanan illər əvvəlki açıqlamaları üçün üzr istədiyi videonu çəkməyə məcbur edilib.

mənbə: interpress