Batumidə üç nəfəri qəzada öldürən şəxsə hökm oxunub

Batumi Şəhər Məhkəməsi prokurorluğun təqdim etdiyi sübutları tam bölüşərək, üç nəfərin ölümü ilə nəticələnən yol-nəqliyyat hadisəsini törətməkdə ittiham olunan şəxs barəsində hökm çıxarıb.

Xeber.ge xəbər verir ki, Gürcüstan Baş Prokurorluğundan bildirilib ki, məhkəmə araşdırması zamanı təqsirləndirilən şəxsin 14 iyun 2025-ci il tarixində Batumidən Sarpi istiqamətində yüksək sürətlə hərəkət edərkən idarəetməni itirdiyi və dayanmış yük avtomobilinə çırpıldığı sübuta yetirilib.

Məlumata əsasən, qəza nəticəsində avtomobildə olan üç nəfər aldığı xəsarətlərdən hadisə yerində dünyasını dəyişib.

Qeyd olunub ki, saxlanılan şəxsə qarşı Gürcüstan Cinayət Məcəlləsinin 276-cı maddəsinin 8-ci hissəsi (Yol hərəkəti təhlükəsizliyi qaydalarını pozma, iki və ya daha çox şəxsin ölümünə səbəb olduqda) ilə ittiham irəli sürülüb.

Batumi Şəhər Məhkəməsinin qərarı ilə təqsirləndirilən şəxs irəli sürülən ittihamlar üzrə tam təqsirli bilinib və o, 7 il 6 ay müddətinə azadlıqdan məhrum edilib.