Abaşada qanlı hesablaşma: Keçmiş məhkum qonşusunu tüfənglə vurub

Gürcüstanın Abaşa bələdiyyəsində ağır cinayət hadisəsi baş verib.

Keçmişdə məhkum olunmuş şəxs qonşusunu odlu silahla yaralayaraq hadisə yerindən qaçıb.

 Xeber.ge xəbər verir ki, Sameqrelo-Zemo Svaneti Polis Departamentinin əməkdaşları qəsdən adam öldürməyə cəhd ittihamı ilə 1959-cu il təvəllüdlü Q.Ş.-ni saxlayıblar.

 İstintaqla müəyyən edilib ki, təqsirləndirilən şəxs aralarında yaranmış mübahisə zəminində 1989-cu il təvəllüdlü qonşusu N.P.-yə ov tüfəngindən atəş açıb.

Yaralı şəxs dərhal xəstəxanaya yerləşdirilib və ona zəruri tibbi yardım göstərilir.

Polis əməkdaşlarının həyata keçirdiyi operativ-axtarış tədbirləri nəticəsində şübhəli şəxs "isti izlərlə" yaxalanıb. Cinayət aləti olan ov tüfəngi maddi sübut kimi müsadirə olunub.

Faktla bağlı Gürcüstan Cinayət Məcəlləsinin 19-108-ci (Qəsdən adam öldürməyə cəhd) maddəsi ilə istintaq aparılır. Bu maddə üzrə təqsirləndirilən şəxsi 15 ilədək müddətə azadlıqdan məhrumetmə cəzası gözləyir.