Ər arvadını küt alətlə qətlə yetirdi

Daxili İşlər Nazirliyinin Tbilisi Polis Departamentinin əməkdaşları tərəfindən keçirilən əməliyyat-axtarış tədbirləri və istintaq hərəkətləri nəticəsində ailə üzvünü qəsdən qətlə yetirməkdə təqsirləndirilən, 1987-ci il təvəllüdlü N.Q. saxlanılıb.

Nazirliyin yaydığı məlumata görə, hadisə avqustun 25-də Tbilisidə baş verib. İstintaqla müəyyən edilib ki, saxlanılan şəxs mübahisə zəminində həyat yoldaşı – 1991-ci il təvəllüdlü A.K.-yə mənzildə küt alətlə çoxsaylı xəsarətlər yetirib və hadisə yerindən qaçıb. Qadın aldığı xəsarətlərdən hadisə yerində dünyasını dəyişib.

Hüquq-mühafizə orqanları tərəfindən həyata keçirilən təxirəsalınmaz tədbirlər nəticəsində şübhəli şəxs cinayəti törətməkdən az sonra saxlanılıb.

Faktla bağlı Cinayət Məcəlləsinin 109-cu maddəsinin “k” bəndi üzrə istintaq aparılır. Həmin maddə ailə üzvünü ağırlaşdırıcı şəraitdə qəsdən qətlə yetirmə cinayətini nəzərdə tutur və 20 ilədək və ya ömürlük azadlıqdan məhrumetmə cəzası ilə cəzalandırılır.