Rustavidə kütləvi davada həbs olunanların sayı 5-ə çatdı

Rustavidə ölümlə nəticələnən kütləvi dava ilə bağlı daha 4 nəfər saxlanılıb.

Gürcüstan Daxili İşlər Nazirliyinin məlumatına görə, saxlanılan şəxslər qətli törədən qatilin tərəfdarlarıdır və hadisə zamanı mərhumun dostlarına qarşı fiziki zorakılıq tətbiq ediblər.

Xeber.ge xəbər verir ki, DİN-in Kvemo Kartli Polis Departamentinin əməkdaşları Rustavi şəhərində baş vermiş və insan ölümü ilə nəticələnən qəsdən sağlamlığa ağır zərər vurma faktı üzrə əməliyyat-istintaq tədbirlərini genişləndirib. Zorakılıq ittihamı ilə daha 4 nəfər qrup halında saxlanılaraq istintaqa cəlb olunub.

Aparılan araşdırmalarla müəyyən edilib ki, ilkin olaraq əsas müqəssir bir nəfərə qarşı fiziki güc tətbiq edib. Münaqişə zamanı zərbə alan şəxs yerə yıxılaraq baş nahiyəsindən ağır xəsarət alıb və hadisə yerindəcə dünyasını dəyişib. Polis hadisədən dərhal sonra "isti izlərlə" keçirdiyi əməliyyatla həmin qatili saxlamışdı.

İstintaqın davamı olaraq məlum olub ki, cinayətkarın yanında olan digər 4 nəfər də davanı böyüdərək mərhumun yanında olan dostlarını amansızcasına döyüblər. Hüquq-mühafizə orqanları davada iştirak edən həmin dörd nəfərin də şəxsiyyətini müəyyən edərək onları şübhəli şəxs qismində həbs edib.

Faktla bağlı Gürcüstan Cinayət Məcəlləsinin 117-ci (sağlamlığa qəsdən ağır zərər vurma) və 126-cı (zorakılıq) maddələri ilə cinayət işi üzrə araşdırmalar davam edir. Saxlanılan şəxsləri 8 ilədək müddətə azadlıqdan məhrumetmə cəzası gözləyir.