Qoqava və Quraşvili Vahid Milli Hərəkatı tərk ediblər
Gürcüstan Parlamentində "Gürcü Arzusu" tərəfindən yaradılmış müvəqqəti istintaq komissiyasının iclasına 2008-ci il müharibəsi işi üzrə
Birləşmiş Qərargahın o zamankı rəisi, general Zaza Qoqava və həmin dövrdə sülhməramlı əməliyyatlar qərargahının rəhbəri, general Mamuka Quraşvili çağırılıb.
Vahid Milli Hərəkatın (VMH) məlumatına görə, onlar komissiya iclasında iştirak etməyi planlaşdırırlar və buna görə də partiyanı tərk ediblər.
"2025-ci il fevralın 18-də keçirilən Vahid Milli Hərəkatın siyasi şurasının iclasında generallar Qoqava və Quraşvili bizə ortaq qərarlarını bildirdilər. Onlar hesab edirlər ki, Gürcüstan dövlətinə, müharibədə həlak olan qəhrəmanların ailələrinə və onların xatirəsinə qarşı məsuliyyət daşıyırlar. Buna görə də 2008-ci il müharibəsi ilə bağlı istənilən sualı cavablandırmağa hazırdırlar – hətta qeyri-legitim parlamentdə belə. Həmin iclasda generallar bütün partiya vəzifələrindən istefa verdilər, çünki müxalifətin ümumi mövqeyi Rusiyanın dəstəklədiyi bu komissiyada siyasətçilərin iştirakını istisna edir. Çünki əsas məqsəd heç bir faktın müəyyən edilməsi deyil, siyasi təbliğat tamaşası yaratmaq və onların həbs olunması ilə bağlı manipulyasiya etməkdir. Buna görə də generallar komissiyada heç bir partiya əlaqəsi olmadan iştirak edəcəklər", – deyə VMH-nin bəyanatında bildirilir.
VMH hakim "Gürcü Arzusu"nun yaratdığı bu parlament komissiyasının Rusiya tərəfindən verilmiş tapşırıqları yerinə yetirdiyini və beynəlxalq məhkəmələrdə Gürcüstanın qazandığı işləri ləğv etməyə çalışdığını bildirir.
"Gürcüstan Rusiyaya qarşı qalib gəldi və 2008-ci il müharibəsi ilə bağlı Putinin bütün yalanlarını ifşa etdi – əvvəlcə 2021-ci il yanvarın 21-də Avropa İnsan Haqları Məhkəməsində, daha sonra isə 2022-ci il iyunun 30-da Haaqa Beynəlxalq Cinayət Məhkəməsində. Məhz generallar Qoqava və Quraşvilinin peşəkar və əsaslandırılmış müdafiəsi sayəsində Gürcüstan ordusunun və dövlətinin həqiqəti sübuta yetirildi. İndi isə "Gürcü Arzusu" bu qələbəni ləğv etməyə çalışır. Bu, onların adlandırdığı 'ədalətin bərpası' deyil, tariximizi Rusiyanın versiyasına uyğun yazmaq və 2008-ci il müharibəsini Gürcüstanın üzərinə atmaq cəhdidir. Əsas məqsəd, beynəlxalq məhkəmə qərarlarını dəyişdirərək işğalçını müdafiə etməkdir," – deyə VMH bəyan edib.
"Gürcü Arzusu"nun birpartiyalı parlamenti 2003-2012-ci illərdəki rejimi və həmin dövrdə vəzifədə olmuş siyasətçilərin fəaliyyətini araşdırmaq üçün müvəqqəti istintaq komissiyası yaradıb. Komissiyaya Tea Tsulukiani rəhbərlik edir. Müxalifət isə bu komissiyanın fəaliyyətini boykot edir.
Komissiya, Mamuka Xazaradze və Badri Caparidzenin iclasa gəlməməsi ilə bağlı prokurorluğa müraciət edib.
mənbə: marneulifm
