Qərb dövlətləri gürcü xalqının seçiminə hörmətlə yanaşmalıdır
Qərb dövlətləri gürcü xalqının seçiminə hörmətlə yanaşmalıdır.
Bunu Gürcüstan parlamentinin spikeri Şalva Papuaşvili jurnalistlərə açıqlamasında deyib.
Ölkənin daxili vəziyyətinə dair beynəlxalq cəmiyyətə çağırış edən spiker Fransa prezidenti Emmanuel Makronun Gürcüstan xalqına ünvanladığı müraciətə cavab olaraq bildirib ki, bütün xarici qüvvələr Gürcüstanın demokratik iradəsini və xalqın seçimini qəbul etməlidir.
Spiker, Gürcüstan parlamentində 61 mandatı olan müxalifət partiyalarının həmin mandatları qəbul edərək parlamentə girməli olduğunu vurğulayıb və parlamentin siyasi dialoq üçün əsas platforma olduğunu qeyd edib. O, hər hansı başqa bir dialoq məkanının siyasi radikalizm olduğunu ifadə edib.
O, həmçinin Gürcüstanın hazırkı vəziyyətinin Avropa İttifaqı üçün bir sınaq olduğunu bildirib və Avropa İttifaqının demokratik dəyərlərə və xalqların suverenliyinə sadiq qalma qabiliyyətini test etdiyini vurğulayıb. Onun sözlərinə görə, bəzi xarici siyasətçilər hələ də sovet dövrünün dəyərlərinə sadiq qalaraq, Gürcüstanda hansı hökumətin olmalı olduğunu müəyyən etməyə çalışırlar.
Qeyd edək ki, Fransa prezidenti Emmanuel Makron Gürcüstan xalqına ünvanladığı müraciətdə, ölkənin Avropa dəyərlərinə doğru irəliləməsinin vacibliyini qeyd edib və Avropa İttifaqının ölkəyə qarşı təzyiq göstərmək yerinə, bərabərhüquqlu tərəfdaşlıq təklif etdiyini vurğulayıb.
mənbə: report
