Litvada siyasi qəsd hazırlığı: Gürcüstan vətəndaşı Yunanıstanda həbs edildi

Yunanıstan mətbuatı Rusiyanın sifarişi ilə Litvada siyasi qətllər planlaşdıran geniş casus şəbəkəsinin üzvlərinin saxlanılması barədə məlumat yayıb.

 Xeber.ge xəbər verir ki, saxlanılanlar arasında əslən yunan olan 55 yaşlı Gürcüstan vətəndaşı da var.

  İstintaq materiallarına görə, sözügedən şəxs fevralın 10-da Salonikidəki evində yaxalanıb. O, Rusiya casus şəbəkəsi ilə əməkdaşlıq etməkdə və Litvaya qarşı yönəlmiş düşmənçilik fəaliyyətlərində iştirakda ittiham olunur. Şəbəkənin iki əsas hədəfi olub:

1.     Rusiyadan qaçaraq Litvada sığınacaq tapmış 46 yaşlı aktivist;

2.     Antirusiya ritorikası ilə tanınan litvalı siyasi müşavir.

  Litva hakimiyyətinin məlumatına görə, casus qrupu hədəf seçilən şəxslər barədə kəşfiyyat məlumatları toplayıb, onların foto və videolarını çəkərək gizli izləmə həyata keçirib. Lakin qətllər baş tutmayıb; Litva polisi ötən ilin martında keçirdiyi xüsusi əməliyyatla cinayətkarların planlarını pozmağa müvəffəq olub.

  Saloniki Apellyasiya Şurası Gürcüstan vətəndaşının Litvaya ekstradisiya edilməsi barədə qərar qəbul edib. "Voria.gr" portalının məlumatına görə, Vilnüs məhkəməsinin hazırladığı ittiham aktında şəbəkənin rəngarəng tərkibi diqqət çəkir. Cinayət işində aşağıdakı şəxslərin adları keçir:

·         4 nəfər etnik yunan (birinin həm də Rusiya vətəndaşlığı var);

·         1 Gürcüstan vətəndaşı;

·         1 Ukrayna vətəndaşı;

·         2 Belarus vətəndaşı;

·         2 Litva vətəndaşı.

Hazırda saxlanılan şəxslərin Litvaya təhvil verilməsi və Rusiya kəşfiyyatı ilə əlaqələrinin digər detallarının araşdırılması istiqamətində hüquqi prosedurlar davam edir.