Gənc oğlanın qətli ilə bağlı iki nəfər saxlanılıb

Acarada törədilmiş qətl hadisəsi ilə bağlı iki nəfər saxlanılıb.

Gürcüstan Daxili İşlər Nazirliyinin yaydığı məlumata görə, qətldə ittiham olunan şəxs əvvəllər də məhkumluq həyatı yaşamışdır.

İstintaqla müəyyən olunub ki, saxlanılan şəxs — 1989-cu il təvəllüdlü G.B. — 4 iyun gecə saatlarında, Kezvachauri bələdiyyəsində, əvvəllər yaranmış mübahisə zəminində tanışı, 1992-ci il təvəllüdlü B.B.-ni odlu silahdan bir neçə dəfə atəş açaraq, onun avtomobilinin içində qətlə yetirib. Cinayətin izlərini gizlətmək məqsədilə avtomobili çaya yuvarladıqdan sonra hadisə yerindən qaçıb.

İstintaq zamanı müəyyən olunub ki, G.B.-nin törətdiyi cinayət barədə onun dostu — 1993-cü il təvəllüdlü T.Ş. məlumatlı olub, lakin o, hadisə barədə hüquq-mühafizə orqanlarına xəbər verməyib.

Kompleks operativ-axtarış və istintaq tədbirləri nəticəsində hər iki şəxs saxlanılıb.

G.B. barəsində qəsdən adam öldürmə, odlu silah və döyüş sursatının qanunsuz əldə edilməsi, saxlanılması və daşınması maddələri ilə ittiham irəli sürülüb. T.Ş. isə ağır cinayət barədə məlumat vermədiyinə görə məsuliyyətə cəlb olunub.

Cinayət işləri Gürcüstan Cinayət Məcəlləsinin 108-ci (qəsdən adam öldürmə), 236-cı (silah saxlama) və 376-cı (cinayət barədə məlumat verməmək) maddələri ilə araşdırılır. Cinayətlərə görə 15 ilədək azadlıqdan məhrumetmə cəzası nəzərdə tutulur.

mənbə: interpress