Avtomobilə xüsusi işıqlı siqnal quraşdırılmasına görə cərimə tətbiq olunur
Avtomobilə xüsusi işıqlı siqnal (yanıb-sönən işıq) quraşdırılmasına görə 2 min lari məbləğində cərimə nəzərdə tutulur.
Bu, artıq Parlamentdə təqdim edilmiş “İnzibati Xətalar Məcəlləsinə” dəyişiklik layihəsində əks olunub.
Layihənin izahat vərəqində qeyd olunur ki, Gürcüstan qanunvericiliyinə əsasən, xüsusi işıqlı siqnalların istifadəsi yalnız müəyyən nəqliyyat vasitələrinə icazə verilir.
Sənəddə göstərilir ki, nəqliyyat vasitələrinə yalnız Gürcüstan qanunvericiliyində nəzərdə tutulmuş rənglərə malik siqnalların quraşdırılmasına icazə verilir və bu cür siqnalların istifadəsinə Gürcüstan Daxili İşlər Nazirliyinin Patrul Polis Departamenti tərəfindən icazə verilir.
Avtomobilə xüsusi işıqlı siqnalın quraşdırılmasına görə cərimə tətbiq olunur.
İzahat sənədində qeyd olunur:
“Təcrübədə vətəndaşlar tərəfindən qanunvericilikdə müəyyən edilən rənglərdən fərqli rənglərə malik siqnalların avtomobillərə quraşdırılması halları artıb. Mövcud qanunvericilik isə bu hərəkəti hüquq pozuntusu kimi müəyyən etməyə imkan vermir. Buna görə də, yol hərəkəti iştirakçısını aldadacaq şəkildə, qanunvericilikdə müəyyən olunmuş rənglərdən fərqli rəngli siqnalların istifadəsinə görə məsuliyyət müəyyən edilməlidir.”
Layihənin müəlliflərinin fikrincə, belə hallara qarşı həm maliyyə sanksiyası, həm də sürücülük vəsiqəsi üzrə bal sistemində azalma tətbiq olunmalıdır.
“Qanunvericiliyə əsasən, məsuliyyət yol hərəkəti iştirakçısını aldatmaq məqsədilə avtomobilə qanunla müəyyən olunmuş rəngdən fərqli istənilən digər rəngdə işıqlı siqnal quraşdırılmasına görə müəyyən edilir. Bu hərəkət 2 000 lari cərimə ilə, işıqlı siqnalın müsadirəsi ilə və sürücülük vəsiqəsinə verilmiş balların 15 bal azalması ilə nəticələnəcək.”
Hərəkətin təkrar törədilməsi də cəzalandırılacaq. Bu halda cərimə 2 500 lari olacaq, əlavə olaraq siqnal müsadirə ediləcək və sürücülük balından 20 bal silinəcək.
Layihənin müəllifləri parlament üzvləridir: Arçil Qorduladze, Tornike Çeişvili, Rati Yonatamişvili, Aluda Quduşauri, Davit Matikaşvili, Tenqiz Şarmanaşvili, Aleksandre Tabatadze, Quram Maçaraşvili və Akaki Aladaşvili.
mənbə: marneulifm
