Əxlaqsızlıqda ittiham olunan 76 yaşlı pedaqoqun işi: Məktəb kollektivi ittihamın qurama olduğunu iddia edir

Şagirdlər, onların valideynləri və müəllimlər əxlaqsız hərəkətlər etməkdə ittiham olunaraq saxlanılan 76 yaşlı fizika müəlliminin azadlığa buraxılmasını tələb edirlər.

XEBER.GE xeber  verir ki, bununla bağlı hazırlanan xüsusi petisiyanı artıq 100-ə yaxın şəxs imzalayıb.

Söhbət 8-ci sinif şagirdi olan bir qızın əxlaqsız hərəkətlər etməkdə günahlandırdığı müəllimdən gedir. Petisiyanı imzalayanlar ittihamın həqiqətə uyğun olmadığını bildirirlər. Onların sözlərinə görə, son günlər şagirdlə müəllim arasında mübahisə yaranıb və qız məhz buna görə ondan qisas almağı planlaşdırıb.

Məktəbin pedaqoqlarından biri sözügedən şagirdin davranışlarına diqqət çəkərək baş verənləri belə şərh edib:

"Hazırda üç nəsil bu insanın yanındadır, hamı onu dəstəkləyir və bunun sadəcə ağlasığmaz olduğunu deyir. Mən bu şagirdə ötən il dərs demişəm; bu, həmin yeniyetmənin ilk belə hərəkəti deyil, müəllim onun üçüncü qurbanıdır — sadəcə əvvəlki iki hal yetkinlik yaşına çatmayanlarla, öz sinif yoldaşları ilə bağlı idi. Dərs saatlarından da, maaşdan da imtina edərəm, amma bir daha o sinfə girə bilmərəm, çünki bu, bir pedaqoq kimi mənim üçün təhlükədir. Ötən il cinsimə görə bəxtim gətirib, amma bu təzyiq və zorakılıq, bu uşağın məktəbdəki münasibəti belədir. Məsələn, qiymət olaraq '9' yazılması belə mənim 'zorakı' adlandırılmağıma səbəb ola bilər."

Valideynlərdən biri isə müəllimin şəxsi keyfiyyətlərini müdafiə edərək qeyd edib: "Petisiyada onun şəxsi xarakteristikası yer alıb. Nəsillərlə biz — valideynlər və övladlarımız onun tərbiyəsini görmüşük. Yaranmış vəziyyət bizi təəccübləndirir, çünki qızların baxış bucağından deyə bilərəm ki, onun nə vaxtsa kiməsə başqa cür, nalayiq baxışla baxdığını belə xatırlamıram."

Eyni zamanda məktəbin tədris hissə müdiri olan saxlanılan müəllim ittihamları qəti şəkildə rədd edir. Onun vəkilinin sözlərinə görə, hadisə 8-ci sinif şagirdinin rəfiqəsi ilə birlikdə əvvəlcədən planlaşdırdığı qisas aktıdır.