Tbilisidə baş vermiş zorakılıq hadisəsinə görə bir nəfər saxlanılıb

Tbilisi Polis Departamentinin Vake-Saburtalo əsas idarəsinin əməkdaşları tərəfindən həyata keçirilmiş operativ və istintaq tədbirləri nəticəsində, 1995-ci il təvəllüdlü İ.T. sağlamlığa qəsdən ağır xəsarət yetirmək ittihamı ilə saxlanılıb.

Bu barədə Daxili İşlər Nazirliyi məlumat yayıb.

Qeyd olunan cinayət 7 ilə qədər azadlıqdan məhrumetmə cəzasını nəzərdə tutur.

İstintaqla müəyyən olunub ki, cari ilin 16 may tarixində, təqsirləndirilən şəxs Tbilisinin Universitet küçəsində yerləşən Yeni İdman Sarayının yaxınlığında 1998-ci il təvəllüdlü B.O.-ya qarşı fiziki zorakılıq tətbiq edib. Zərərçəkən yıxılaraq baş nahiyəsindən ciddi xəsarət alıb.

Hadisədən sonra İ.T. hadisə yerindən qaçıb, B.O. isə xəstəxanaya yerləşdirilərək müalicə alır. Hüquq-mühafizə orqanlarının operativ tədbirləri nəticəsində İ.T. hadisədən bir neçə saat sonra saxlanılıb.

Faktla bağlı istintaq Gürcüstan Cinayət Məcəlləsinin 117-ci maddəsinin birinci hissəsi ilə aparılır. Bu maddə sağlamlığa qəsdən ağır zərər yetirməni nəzərdə tutur.

mənbə: interpress